Çmimi “FIFA The Best Men’s Player 2024”, i ndarë mbrëmë në skenën madhështore të Dohas, në Katar, shkoi për Vinicius Junior. Braziliani mposhti Rodrin, fituesin e fundit të “Topit të Artë”, dhe shokun e skuadrës, Jude Bellingham. Deklaratat e Gianni Infantinos, të publikuara në rrjetet sociale për të shpallur fituesin dhe për ta uruar lojtarin e Real Madridit, kanë ngjallur diskutime, veçanërisht mes një pjese të madhe të tifozërisë spanjolle anti-Real Madrid:

“Urime yllit të Real Madridit dhe Brazilit, Vinícius Júnior, që u votua si lojtari më i mirë i FIFA-s për vitin 2024! Pavarësisht nëse bëhet fjalë për golat e tu, talentin tënd sulmues apo punën në ekip, ti ke sjellë gëzim për kaq shumë njerëz në mbarë botën dhe ke arritur suksese të mëdha në La Liga e Champions League me Real Madridin. Ti spikat gjithashtu si një model për shumë tifozë dhe lojtarë të rinj aspirues; mishëron vërtet shpirtin e lojës sonë të bukur".

Në Spanjë, Vinicius shihet si një nga protagonistët kryesorë në luftën kundër racizmit, por edhe si një futbollist që shpesh provokon tifozë të skuadrave kundërshtare. Gesti i fundit në Vallecas, gjatë derbit me Rayo Vallecano, përfundoi në qendër të kritikave vetëm disa ditë më parë. Për këtë arsye, komplimentet e Infantinos dhe përdorimi i fjalës "model" nuk janë pranuar nga disa.

Sidoqoftë, kreu i FIFA-s shpjegoi gjithashtu mënyrën e votimit që çoi në triumfin e Viniciusit: "Si gjithmonë, tifozët luajtën një rol kyç në zgjedhjen e fituesit, në një sistem votimi të baraspeshuar mes tifozëve, kapitenëve aktualë dhe trajnerëve të të gjitha skuadrave kombëtare, femra dhe meshkuj, si dhe përfaqësuesve të mediave".