Andres Iniesta e ka përfunduar karrierën e tij si futbollist me një ndeshje miqësore mes legjendave të Barcelonës dhe Real Madridit në Tokio, ndërsa tani synon të nisë rrugëtimin e tij si trajner.

Legjenda e futbollit spanjoll, tashmë 40 vjeç, kishte njoftuar në tetor se do “t’i varte këpucët në gozhdë”, duke i dhënë fund një karriere që përfshin triumfe të jashtëzakonshme: dy Kampionate Europiane dhe Kupa e Botës në vitin 2010.

Përballë 45 mijë spektatorëve të mbledhur për ta nderuar, Iniesta dha një tjetër shfaqje të aftësive që i mundësuan të fitonte 9 tituj të La Liga-s dhe 4 herë Champions League gjatë 16 viteve të tij me Barcelonën. Ai e përmbylli karrierën me stil, duke dërguar një krosim në minutën e fundit, që u devijua në rrjetën e Real Madridit, duke i dhënë fitoren 2-1 Barcelonës.

"Për mua ishte një ndeshje e shkëlqyer, shpresoj edhe për tifozët japonezë, – tha Iniesta, i cili kaloi pesë vite duke luajtur në Japoni, pas largimit nga Barcelona më 2018. – Nëse tifozët janë kthyer në shtëpi të lumtur, atëherë edhe unë jam shumë i kënaqur".

Gjatë qëndrimit të tij në “Camp Nou”, Iniesta regjistroi 674 paraqitje dhe fitoi gjithsej 32 trofe. Pas largimit nga Barcelona, ai u transferua te Vissel Kobe në Japoni dhe më pas zhvilloi një sezon të fundit në Emiratet e Bashkuara Arabe.

Po cilat janë planet e tij për të ardhmen? Përgjigjet vetë Iniesta: "Jam duke studiuar që të marr licencën e trajnerit, pastaj të shohim se ku do të më çojë karriera ime, tashmë në një rol ndryshe".