Shqipëria ka vendosur që duke nisur nga viti 2025 të ketë një ushtri me rreth 10 mijë anëtarë dhe ku objektiv duhet të arrihet brenda vitit 2026. Ministri i Mbrojtjes Pirro Vengu tha në rtsh se këtij objektivi i shërben edhe fushata aktuale për rekrutimin e ushtarëve të rinj për vitin e ardhshëm.

“Në rrafshin afatshkurtër, synimi ynë është të kemi 10 mijë forca aktive të mobilizueshme. Pra, nga 8 mijë që jemi sot të arrijmë në 10 mijë.”, u shpreh Vengu.

Por sa do të duan shqiptarët të shkojnë ushtarë? Misioni nuk duket i lehtë për të shtuar 2 mijë ushtarë të tjerë çdo vit, sepse ata që rekrutohen janë më të paktë.

Ministri thotë: "Në vitin 2023 kemi pasur 275 ushtarë rekrutë të rinj aktivë, në 2024 kemi 485, pra 210 vetë më shumë se vitin e kaluar, ndërkohë që deri tani, nëse i referohemi shifrave paraprake të shprehjes së interesit për vitin që vjen kemi 272 vetë".

Por sa para do të marrin rekrutët e rinj ushtarë?

“Sot, Forcat e Armatosura janë mbi nivelin mesatar të administratës publike, mbi 900 mijë lekë (të vjetra në muaj). Ndërsa rekruti i ri paguhet neto 75 mijë lekë në muaj. Kjo është një pagesë e konsiderueshme për një të ri apo të re që sapo ka nisur jetën aktive, që ka mbaruar një cikël 9 vjeçar apo edhe më të lartë.”, tha Vengu.