Paris- Bie qeveria në Francë. Kabineti i kryeministrit Michel Barnier ka humbur votën e mocionit të mosbesimit në parlament, duke e bërë atë administratën e parë të rrëzuar në këtë mënyrë që nga viti 1962 dhe qeveria më jetëshkurtër e Republikës.

Një total prej 331 deputetësh votuan në favor të mocionit të paraqitur nga aleanca e majtë NFP, me një shumicë prej 288 të nevojshme për të rrëzuar qeverinë.

Barnier, i cili ka qenë për gati tre muaj në detyrë, tani është i detyruar t’i paraqesë dorëheqjen e tij dhe të qeverisë së tij presidentit Emmanuel Macron.

Rezultati thellon krizën politike të Francës dhe shënon një goditje të rëndësishme për Bashkimin Evropian në një kohë kur Gjermania është gjithashtu e zhytur në një fushatë zgjedhore parlamentare deri në shkurt dhe javë përpara se Donald Trump të kthehet në Shtëpinë e Bardhë.