Tiranë – Vrasja e 50 vjeçarit Alfred Dedja në mes të një lokali në Ndroq, pasoi arratinë e të dyshuarit.

Ai u identifikua si Julian Gjoshi 26 vjeç. Pas krimit, i dyshuari mori arratinë. Por 24 orë më vonë, ai u dorëzua vetë në polici.

Në lidhje me vetëdorëzimin e të dyshuarit, policia e Tiranës tha mbrëmjen e së hënës se pas vrasjes së të dielës 1 dhjetor ora 15.30, Julian Gjoshit iu bllokuan shtigjet.

Pas veprimeve të policisë Tiranë në bashkëpunim me Drejtorinë Vendore të Policisë Durrës, kontrolleve të shumta të ushtruara bazuar në inteligjencës policore, u bë gjetja dhe bllokimi i automjetit të dyshuar që kishte përdorur autori.

Po ashtu u bë bllokimi i rrugëkalimeve dhe, në pamundësi për të qëndruar i fshehur, autori i dyshuari u dorëzua në polici.

Për zbardhjen dhe dokumentimin ligjor të ngjarjes, për sigurimin dhe sekuestrimin e provave dhe kapjen e ndalimin e autorit, Strukturat e Hetimit të Krimit në Tiranë, kanë punuar me Prokurorinë dhe strukturat e tjetra të Policisë së Shtetit.

Grupi i posaçëm hetimor, në drejtimin e Prokurorisë, po vijon punën për zbardhjen e plotë të rrethanave të ngjarjes dhe dokumentimin e saj ligjor. Ende mbeten të paqarta motivet e vrasjes.

SPAK: Alfred Dedja nuk është i përfshirë në rrëmbimin dhe zhdukjen e Jan Prengës

Prokuroria e Posaçme Kundër Korrupsionit dhe Krimit të Organizuar ka hedhur poshtë deklaratat që e lidhin Alfred Dedjan, i cili u vra mbrëmjen e së dielës (1 dhjetor) në Ndroq, me një ngjarje që daton në vitin 2020, e që po hetohet nga SPAK.

Sipas SPAK, deklaratat në media janë të pavërteta, ndërsa shton se Alfred Dedja, nuk rezulton të jetë dëshmitar apo të kishte lidhje me pengmarrjen, ekzekutimin dhe fshehjen e trupit të viktimës Jan Prengës.

“Mbështetur mbi hetimet e kryera nga SPAK deri në këtë fazë, në kuadër të procedimit penal nr. 60 të vitit 2020, personi i ekzekutuar mbrëmjen e djeshme, Alfred Dedja nuk rezulton të jetë dëshmitar apo të kishte lidhje me pengmarrjen, ekzekutimin dhe fshehjen e trupit të viktimës Jan Prenga, ngjarje e ndodhur në janar të vitit 2020”, njofton SPAK.

SPAK nënvizon se emri i tij nuk rezulton të ketë qenë i përfshirë në listën e punonjësve apo dhe listëpagesat e kompleksit “Golden”, në Shijak, pronë e Altin Hajrit, në kohën e kryerjes së krimit.

“I pandehuri Altin Hajri, pronar i kompleksit “Golden” akuzohet si pjesëmarrës në grupin e strukturuar kriminal që ka kryer rrëmbimin e shtetasit Jan Prenga. Ai është në masë sigurimi “Arrest me burg” në mungesë dhe çështja në ngarkim të tij po gjykohet në Gjykatën e Posaçme Kundër Korrupsionit dhe Krimit të Organizuar”, njofton SPAK.

Sipas SPAK “në gjykim janë Dritan Rexhepi dhe Gentjan Funiqi, të cilët kanë urdhëruar rrëmbimin e tij; Martin Bleta dhe Korado Kështenja që organizuan pengmarrjen, ndërsa ekzekutimin Artan Doçaj, Aldo Majnishta dhe Geraldo Martini, të cilët e dërguan viktimën pas rrëmbimit, në kompleksin “Golden””.

Prokuroria e Posaçme Kundër Korrupsionit dhe Krimit të Organizuar bën me dije se i ka drejtuar disa kërkesa zyrtare strukturave të Policisë, si organi përgjegjës për ekzekutimin e masës së sigurisë ndaj shtetasit, Altin Hajri.

Në foto: Alfred Dedja (majtas) dhe autori i dyshuar i vrasjes, Julian Gjoshi (djathtas)