Mesazhet e dërguara Barcelonës për 125-vjetorin po shfaqen gjithandej, duke zgjuar kujtimet e atyre që kanë lënë gjurmë të pashlyeshme në historinë e klubit katalanas. Mesazhe kanë mbërritur nga çdo cep i botës, madje edhe nga figura si Xavi Hernández, i cili nuk pati një largim të qetë nga Barça, pas zëvendësimit të tij me Hansi Flick (trajneri aktual i Barcelonës).

Ish-mesfushori legjendar dhe ish-trajneri i Barcelonës ka publikuar disa fotografi nga karriera e tij si lojtar, duke shkruar: "125 vite histori. Gëzuar, Barça!"

Edhe braziliani Neymar ka përdorur rrjetet sociale për të festuar 125-vjetorin e themelimit të Barçës, duke publikuar në Instagram një foto të një prej festimeve të tij të golave me fanellën blaugrana.

Së fundi, por jo më pak i rëndësishëm, ishte gjesti i Real Madridit, ose më saktë urimi me këtë rast: "Urime për 125-vjetorin tënd, Barcelona! Është nder për Real Madridin të konkurrojë me një rival kaq të madh gjatë gjithë historisë sonë". Një shembull i shkëlqyer sportiviteti për botën e futbollit, që shpeshherë përfshihet nga polemika, kritika dhe mungesë “fair play”.