Mungesa e Lautaro Martínez mes kandidatëve për çmimin “The Best FIFA 2024” ka ngjallur polemika, veçanërisht brenda Interit. Pavarësisht një sezoni të jashtëzakonshëm, i kurorëzuar me fitimin e Serie A dhe “Copa América”, kapiteni zikaltër nuk u mor parasysh. CEO i Interit, Giuseppe Marotta, shprehu gjithë zhgënjimin e tij, duke e quajtur përjashtimin "befasues dhe zhgënjyes":

“Lautaro meriton më shumë respekt dhe njohje. Ai e çoi Interin drejt arritjeve historike dhe udhëhoqi Argjentinën drejt suksesit në Kupën e Amerikës. Në të dyja garat ishte golashënuesi më i mirë. Injorimi i këtyre paraqitjeve është një sinjal negativ”.

Marotta nënvizoi se përjashtimi i "Toros" duket se anashkalon jo vetëm golat dhe sukseset, por edhe ndikimin vendimtar në ndeshjet më të rëndësishme. Ai shtoi: “Shpresojmë që në të ardhmen lojtarët që shkëlqejnë si Lautaro të marrin vlerësimin e merituar”.

Mungesa e Martínez mes kandidatëve për “The Best FIFA 2024” është një goditje për Interin, që priste vlerësim për kapitenin e vet pas një sezoni ku ishte protagonist absolut.