Paul Pogba, i cili sapo ka ndërprerë kontratën me Juventusin, po përballet me një periudhë të vështirë, si në aspektin profesional, ashtu edhe atë familjar. Dje në Paris ka nisur procesi gjyqësor për rastin e shantazhit që përfshin vëllain e tij të madh, Mathias Pogba, dhe pesë persona të tjerë, të akuzuar për përpjekje për të marrë 13 milionë euro nga mesfushori i njohur.

Të akuzuarit, përfshirë disa miq të fëmijërisë së Pogba dhe të njohur nga lagjja e tij në Roissy-en-Brie, duhet të paraqiten në gjykatë deri më 3 dhjetor për përfshirjen e tyre në këtë çështje. Procesi është rezultat i një hetimi 2-vjeçar, pas të cilit gjykatësit francezë vendosën që Mathias dhe të tjerët të dërgoheshin në gjyq.

Sipas dokumenteve të procesit, gjashtë të akuzuarit dyshohet se më 19 mars 2022 kanë organizuar një takim në periferi të Parisit për të “detyruar” Pogba t’iu japë para. Pogba ka denoncuar se ndërmjet marsit dhe korrikut 2022 ka qenë viktimë e tentativave për shantazh, që përfshinin miliona euro.

Në një nga dëshmitë e tij, Pogba rrëfen se është “futur në kurth” nga disa miq të fëmijërisë, të cilët, së bashku me dy burra të maskuar, i kërkuan 13 milionë euro. Ai raportohet të ketë dhënë 100.000 euro, por gjithashtu deklaroi se kishte identifikuar vëllain e tij si një nga të pranishmit me maskë.

Mathias Pogba, një futbollist i kategorive të ulëta, për vite të tëra ka pasur rolin e mbrojtësit të vëllait të tij të vogël. Megjithatë, marrëdhënia mes tyre është përkeqësuar rëndë, duke kulmuar me akuza publike nga Mathias në Twitter, ku ai e cilësoi Paul si një "tradhtar të ulët".

Procesi përbën një kapitull tjetër të errët në jetën e një prej futbollistëve më të njohur të botës, duke e vënë në qendër të vëmendjes jo vetëm për aftësitë e tij sportive, por edhe për çështjet personale dhe familjare.