Liverpooli po kalon një moment të artë. Pas fitores dramatike 3-2 ndaj Southamptonit në “St.Mary’s Stadium”, të siguruar me përmbysje, “Reds” janë tani +8 pikë nga Manchester City, që është në krizë. Skuadra e Slot mposhti 2-0 edhe Real Madridin në Champions League, me objektivin tashmë plotësisht të qartë: të sigurojë kualifikimin në fazën tjetër.

E vetmja pikë e errët në këtë fillim sezoni të shkëlqyer është mungesa e një marrëveshjeje për rinovimin e kontratës së Mohamed Salah, e cila skadon më 30 qershor 2025. Pas ndeshjes kundër Southamptonit, që u vendos nga dopieta e tij, Salah shprehu zhgënjimin e tij për situatën:

"Jemi gati në dhjetor dhe ende nuk kam marrë asnjë propozim për rinovim. Probabiliteti është më i madh që të jem jashtë sesa brenda. Kam kaluar shumë vite këtu dhe nuk ka një klub si ky, por nuk është e gjitha në duart e mia. Tifozët më duan dhe unë i dua ata, por nuk vendosim ne. Jam i zhgënjyer që nuk ka pasur ende asnjë lëvizje për kontratën time".

Këto fjalë nuk janë pritur mirë nga legjenda e Liverpool-it, Jamie Carragher. Në një intervistë për “Sky Sports”, ai u shpreh: "Çështja e rinovimit të Salah? Natyrisht që ka pasur diskutime. Momentalisht, ekziston një diferencë e madhe mes asaj që Salah dhe agjenti i tij mendojnë se vlejnë, si financiarisht, ashtu edhe për kohëzgjatjen e kontratës, dhe asaj që Liverpool-i ofron. Arsyeja pse Liverpool-i nuk ka bërë ende një ofertë zyrtare është se e di që Salah do ta refuzojë.

Jam i zhgënjyer nga ai. Liverpool-i kishte ndeshje jetike kundër Real Madridit të mërkurën dhe një tjetër ndaj Manchester City këtë fundjavë, ndërsa Salah, në shtatë vite, ka folur vetëm dy herë në zonën mikse për çështjen e kontratës. Nëse vazhdon me këto komente, vetëm sa e tregon veten egoist".