Presidentja e Meksikës Claudia Sheinbaum ka kundërshtuar pretendimet e Presidentit të zgjedhur amerikan Donald Trump se është arritur një marrëveshje për të ndaluar migrimin në kufirin amerikan.

Ky zhvillim erdhi pasi presidenti i zgjedhur i SHBA, Donald Trump shpalli fitoren për ndalimin e imigracionit të paligjshëm përmes Meksikës të mërkurën, pasi bisedoi me liderin e atij vendi. Por presidentja meksikane Claudia Sheinbaum reagoi menjëherë më pas dhe tha se Meksika nuk ka asnjë interes të mbyllte kufijtë e saj.

Të dy folën vetëm disa ditë pasi Trump kërcënoi se do të vendoste tarifa të reja gjithëpërfshirëse ndaj Kanadasë dhe Meksikës, si pjesë e përpjekjes së tij për të goditur imigracionin e paligjshëm dhe drogën.

Trump tha se Sheinbaum "ra dakord të ndalojë migrimin përmes Meksikës".

Por Sheinbaum tregoi publikisht në mediat sociale se ajo i tha Trumpit se Meksika po kujdeset vetë për karvanët e emigrantëve.

Ajo tha se as që bëhet fjalë të pranojë mbyllje kufijsh duke e nxjerrë kështu mashtrues Donald Trampin.

"Ne përsërisim se qëndrimi i Meksikës nuk është të mbyllë kufijtë, por të ndërtojë ura midis qeverive dhe midis popujve," sqaroi Sheinbaum.

Ndërsa gjendja e tarifave të propozuara mbeti e paqartë, Trump tha në një postim në llogarinë e tij të Truth Social se Meksika "po mbyllte në mënyrë efektive kufirin tonë jugor". Ai e quajti atë një "bisedë shumë produktive".

Shkëmbimi mes dy liderëve duket se konfirmoi për Trump vlerën e kërcënimit për të ndërprerë tregtinë me taksat e importit.

Postimi i tij fillestar në mediat sociale ka lëvizur tregjet financiare dhe i dha atij një përgjigje që e përshkroi si një fitore.

Edhe nëse tarifat e propozuara dështojnë të materializohen, Trump mund t’u thotë mbështetësve se thjesht mundësia e aplikimit të tyre është një mjet efektiv i politikës dhe kështu, të vazhdojë të mbështetet në kërcënimet tarifore.

Claudia Sheinbaum deklaroi se Meksika mund të hakmerret me tarifat e saj, pasi presidenti i sapozgjedhur i SHBA-së, Donald Trump kërcënoi se do të vendoste 25% tarifa importi për mallrat meksikane nëse vendi nuk ndalon rrjedhën e drogës dhe migrantët përtej kufirit.

Sheinbaum tha se ishte e gatshme të angazhohej në bisedime mbi çështjet, por tha se droga ishte një problem i SHBA.

“Një tarifë do të pasohej nga një tjetër si përgjigje, dhe kështu me radhë derisa të rrezikojmë bizneset e zakonshme”, tha Sheinbaum, duke iu referuar prodhuesve amerikanë të automjeteve që kanë fabrika në të dy anët e kufirit.

Ajo tha të martën se Meksika kishte bërë shumë për të frenuar fluksin e emigrantëve, duke vënë në dukje se "karvanët e emigrantëve nuk arrijnë më në kufi".

Sheinbaum tha se Meksika vuan nga një fluks armësh të kontrabanduara nga Shtetet e Bashkuara. Ajo shtoi se fluksi i drogës "është një problem i shëndetit publik dhe konsumit në shoqërinë amerikane".