Mbrojtësi i kombëtares, Arlind Ajeti ishte krah trajnerit Silvinjo në konferencën për media. Ajeti tha se ekipi kuqezi i ka të gjitha cilësitë për t’ia dalë ndaj Çekisë. Ai dha një mesazh shumë të rëndësishëm për të gjithë tifozët shqiptarë, që të respektojnë himnin çek dhe ekipin e Çekisë në fushë.

Si veteran i ekipit, çfarë duhet t’i japësh grupit?

Besoj se i kemi të gjitha cilësitë e duhura që të arrijmë edhe kualifikimin në Botëror. Është rrugë e gjatë, por besoj që, nëse të gjithë japim maksimumin dhe lëmë shpirtin për kombëtaren, do ta arrijmë edhe atë.

Mesazhi për tifozët…

Iu bëjmë thirrje të gjithë tifozëve që të respektojnë himnin e Çekisë. Pavarësisht se çfarë ka ndodhur në Çeki, ne duhet të tregojmë anën tonë të mirë.

Çfarë ekipi do të shohim në fushë?

Shpresoj që ta shoh ekipin siç ishte në Gjeorgji, e dimë që është një ndeshje e vështirë, i njohim cilësitë e Çekisë. Jemi përgatitur mirë dhe shpresoj që t’ia dalim me sukses.

Çfarë surprize do t’i rezervosh Chory?

Chory ka bërë një ndeshje të mirë herën e parë. Është një lojtar fizik, rreth 2 metra i gjatë, e vështirë t’ia dalësh. Shpresoj ta bllokojmë si mbrojtje.

Sa e vështirë është Liga e Kombeve? 

Janë të gjitha të mundura në futboll. Unë besoj në ekip, në cilësitë e të gjithë lojtarëve. Ne synojmë vendin e parë të grupit, të fitojmë këto dy ndeshje. Me cilësitë që kemi, mendoj se ia dalim.

A mund të përsërisim suksesin e vitit të kaluar, ku fituam 3-0?

Besoj që mund t’ia dalim sërish,  edhe pse kjo është një ndeshje tjetër. Çdo ndeshje nis nga 0-0 dhe ne i kemi cilësitë për të marrë sërish rezultat pozitiv. Shpresoj t’ia dalim.

Cila është formula që ju gjithmonë jepni një performancë të nivelit të lartë?

Ndjenja në kombëtare është gjithmonë ndryshe. Të jesh pjesë e kombëtares është shumë e veçantë, ata që janë pjesë e dinë.