Inter Miami i Lionel Messit u eliminua çuditërisht nga "play-off"-i i MLS, pasi humbi 3-2 në shtëpi ndaj Atlanta United. Një disfatë e papritur, duke qenë se skuadra nga Florida ishte favorite e madhe për ta fituar titullin, pas dominimit të sezonit të rregullt.

Për shkak të këtij rezultati negativ, tetë herë fituesi i "Topit të Artë" nuk do të arrijë ta ngrejë dot trofeun më të rëndësishëm në SHBA, njërin nga tre titujt që nuk ka arritur t’i fitojë ende në karrierën e shkëlqyer. Gjatë 20 viteve të tij si futbollist profesionist, Messi mori pjesë në 16 kompeticione të ndryshme midis Barcelonës, PSG, Inter Miami dhe kombëtares së Argjentinës.

Në 13 prej tyre u kurorëzua kampion të paktën një herë. Me Barcelonën (La Liga, Kupa e Mbretit, Superkupa e Spanjës, Liga e Kampionëve, Superkupa e Europës dhe Kupa e Botës për Klube) dhe ekipin kombëtar (Kupa e Botës, "Copa América", "Finalissimo" dhe Olimpiada) ai fitoi gjithçka. Gjatë karrierës në Ligue 1 humbi vetëm Kupën e Francës.

Trofeu i dytë që numri 10 argjentinas nuk arriti ta ngrinte ishte Kupa e Kampionëve CONCACAF. Inter Miami u eliminua në çerekfinale nga Monterrey. E fundit, padyshim, është Kupa e MLS. Megjithatë, në këtë të fundit do të jetë në gjendje të provojë përsëri pas disa muajsh.

Ja të gjithë titujt e fituar nga Messi në karrierën e tij:

ME BARCELONËN:

Liga e Kampionëve: 4 (2005/06; 2008/09; 2010/11; 2014/15)

La Liga: 10 (2004/05; 2005/06; 2008/09; 2009/10; 2010/11; 2012/13; 2014/15; 2015/16; 2017/18; 2018/19)

Kupa e Mbretit: 7 (2008/09; 2011/12; 2014/15; 2015/16; 2016/17; 2017/18; 2020/21).

Kupa e Botës për Klube: 3 (2009; 2011; 2015).

Superkupa Europiane: 3 (2009/10; 2011/12; 2015/16).

Superkupa e Spanjës: 8 (2005/06; 2006/07; 2009/10; 2010/11; 2011/12; 2013/14; 2016/17; 2018/19)

ME PSG

Ligue 1: 2 (2021/22; 2022/23).

Superkupa e Francës: 1 (2021/22).

ME INTER MIAMI

Kupa e Ligës: 1 (2023)

ME ARGJENTINËN

Kupa e Botës: 1 (2022)

"Copa America": 2 (2021 dhe 2024).

Lojërat Olimpike: 1 (Pekin 2008).

"Finalissimo": 1 (2022).