Vanderlei Luxemburgo, ish-trajneri i Brazilit dhe Real Madridit nisi një sulm të ashpër ndaj bashkatdhetarit të tij, Vinicius, për sjelljen në fushë. "Mendoj se e provokon shumë nga persekutimi që merr nëpër stadiume, duke bërë gjëra që nuk duhet.

Për shembull, e kam një rast të tillë tipik në kokën time, të ndodhur në ndeshjen kundër Bayern Munich. Kundërshtari, Kimmich, ia dorëzon topin me mirësjellje dhe Vinicius e lëshon në tokë. Kundërshtari ia dorëzon sërish topin në duar, por Vinicius përsërit të njëjtën sjellje provokuese".

Luxemburgo e përjashton faktin se ajo që ndodh me të në stadiume të ndryshme spanjolle është racizëm ndaj Vinicius: "Ai merr një goditje gjatë lojës dhe më pas ngrihet e sulmon lojtarin kundërshtar, sikur të mos ketë arbitër për këtë punë.

Imagjinoni sa goditje ka marrë Pele, sa Zico. Ai irritohet nga goditjet sikur të ishin persekutim i vërtetë, e lidh gjithcka me ngjyrën. Në fakt, reagimet vijnë  nga provokimet e tij të gjithanshme".