Ambasadori tha se mbështetja për Policinë shqiptare do të vijojë me asistencë, teknologji bashkëkohore dhe ekspertizë të lartë, elemente të cilat do t’i japin armatës policore revansh përballë krimit

TIRANË – Drejtori i Përgjithshëm i Policisë së Shtetit Drejtues Madhor Ilir Proda zhvilloi një takim me Ambasadorin e Gjermanisë në Shqipëri Karlfried Bergner.

Në të ishte i pranishëm dhe Oficeri i Kontaktit i BKA-së në Shqipëri Christian Hensel, raporton noa.al.

Ky takim, kishte qëllim të dyfishtë, prezantimin ndërmjet palëve, si dhe dorëzimin e një donacioni me pajisje kompjuterike që do të shkojnë në funksion të punës së Departamentit të Policisë Kriminale.

Proda, në fjalën e tij gjatë takimit me Ambasadorin dhe në ceremoninë e dorëzimit të pajisjeve, falënderoi Ambasadorin për mbështetjen e qëndrueshme dhe shumëdimensionale të agjencive ligjzbatuese gjermane, si dhe vlerësoi punën e Oficerëve të Kontaktit të BKA-së dhe të Policisë Federale Gjermane.

Më tej, kryepolici njohu ambasadorin me procesin e konkurrimeve për përzgjedhjen e drejtuesve të rinj të strukturave policore.

Proda siguroi Ambasadorin për vijimësinë dhe forcimin e bashkëpunimit në të gjitha fushat, me theks të veçantë luftën kundër krimit të organizuar.

Në këtë kuadër, Proda tha se donacioni i sotëm shënjon veçse hapin e radhës në rrugën historike të bashkëpunimit me partnerët gjermanë.

Për Prodën, bashkëpunimi mes Policisë së Shtetit dhe Policisë Gjermane është një binom i qëndrueshëm dhe i suksesshëm në luftën kundër krimit të organizuar.

Ambasadori Bergner tha se mbështetja e agjencive ligjzbatuese gjermane, e fituar nga Policia shqiptare, duhet të ndihmojë në luftën kundër krimit të organizuar, si dhe të mbështesë profesionalizmin, korrektesën dhe angazhimin e punonjësve të Policisë së Shtetit, kushte të rëndësishme këto për anëtarësimin në BE.

Ambasadori tha se mbështetja për Policinë shqiptare do të vijojë me asistencë, teknologji bashkëkohore dhe ekspertizë të lartë, elemente të cilat do t’i japin armatës policore revansh përballë krimit.

Donacioni i sotëm nga BKA-ja gjermane është pjesë e donacioneve me vlerë totale 100 000 euro, me pajisje të teknologjisë bashkëkohore, të cilat kanë ndikuar dhe do ndikojnë ndjeshëm në progresimin e luftës kundër krimit të organizuar, terrorizmit, radikalizmit ekstrem, krimeve kundër personit, trafikimit të lëndëve narkotike dhe pastrimit të parave.