Detaje të rënda për të miturën në Korçë, u abuzua prej 4 vitesh që kur ishte 12 vjeçe

Policia e Korçës tha sonte se një burrë po kërkohet pasi ka kryer marrëdhënie seksuale me një vajzë në moshë të mitur.

Specialistët për Hetimin e Krimeve të Komisariatit të Policisë Maliq, si rezultat i veprimeve hetimore të kryera nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Korçë, shpallën në kërkim shtetasin: E. Sh., 43 vjeç, banues në fshatin Barç, Korçë.

Burri është i dyshuar për veprën penale "Marrëdhënie seksuale ose homoseksuale me të mitur".

Policia tha se ai ka kryer marrëdhënie seksuale me një shtetase të mitur 16 vjeçare.

Veprimet procedurale me të miturën, janë kryer në prezencën e psikologut, prindit dhe përfaqësuesit ligjor.

Në drejtimin e Prokurorisë vijojnë hetimet për dokumentimin e plotë të këtij rasti dhe për kapjen e autorit të dyshuar.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme. /noa.al