Drejtori i ri i Përgjithshëm i Policisë së Shtetit Ilir Proda e ka nisur ndryshe nga paraardhësit e tij ditën e parë të punës.

Larg sloganeve e premtimeve, Proda firmën e parë e ka hedhur për bashkëshorten e një prej Dëshmorëve të Policisë.

Anisa Duçkollari, shefe Sektori në Drejtorinë e Burimeve Njerëzore të DPPSH, bashkëshortja e Sajmir Duçkollarit, një prej 4 oficerëve të Policisë të varë nga Dritan Dajti gjatë një operacioni në Durres, nëna e dy djemve, 39 vjeçarja Duçkollari, nga dje është në krye të Drejtorisë së Burimeve Njerëzore.

Drejtor Proda duket se e ka nisur mbarë e me këmbë në tokë detyrën e vështirë që kërkon guxim, largpamësi e humanizëm në vendim/marrje.

Emërimi i Anisa Duçkollarit është vlerësim për aktin sublim të bashkëshortit të saj dhe shkon në një linjë mendimi dhe vlerësimi që më herët Kryeministri Rama ka kërkuar përfaqësim në nivele të larta nga gra e vajza të Policisë e padiskutim së pari nga familjarë të Dëshmorëve të Policisë.

Prodën e presin sfida të mëdha përpara që kërkojnë guxim e kurajo dhe që zgjidhja sa më e drejtë e tyre do të çojë në rritje të besimit të qytetarëve te Policia, por dhe vetë trupës Policore te lidershipi i ri i Policisë së Shtetit.

Vlerësimi i sakrificës sublime të Dëshmorëve të Policisë, siç është emërimi i parë, është sinjal pozitiv.

Duçkollari është drejtoresha e parë në Policinë e Shtetit në këtë post me shumë rëndësi.

Në foto: Drejtori i ri i Përgjithshëm i Policisë së Shtetit Ilir Proda