Fabio Capello komentoi rikthimin te golat e Dusan Vlahovic dhe Lautaro Martinez, të shtunën në Serie A: "Kampionati ka gjetur dy sulmues të mëdhenj. Kishte pak dyshime për ‘zgjimin’ e Vlahovic dhe Lautaro, duke pasur parasysh cilësitë e tyre, por është e rëndësishme për Juventusin dhe Interin që ata kthehen te golat në prag të javës së Champions League.

Bardhezinjtë ishin pak zhgënjyes në pjesën e parë, duke luajtur sipas linjave të testeve të mëparshme: posedim i ngadaltë dhe i parashikueshëm i topit. Në pjesën e dytë, pasi u zhbllokua rezultati, ata treguan se kanë potencial të shkëlqyer.

Më pëlqeu shumë dëshira e sulmuesve në skuadrën e Mago Motta. Ata i bënin shumë presion kundërshtarit për ta rikuperuar topin dhe u hodhën mirë në hapësira. Pas 1-0, Genoa uli nivelin e mbrojtjes dhe gjithçka ishte e lehtë për Juventusin.

Vlahovic ndërroi marshin pas penalltisë. Në golin e dytë ishte shumë i mirë jo vetëm në finalizim, por edhe në lëvizje. Më pëlqyen edhe zëvendësimet, u futën në lojë me një dëshirë të madhe për të bërë mirë.

Tani që argjentinasi iu është rikthyer golave, edhe Interi do ta ketë më të lehtë për të fituar. Zikaltrit duhet të rregullojnë pak përzierjen e tyre mbrojtëse. Ata pësuan 7 gola në 6 ndeshjet e para, sezonin e kaluar na kishin mësuar me diçka tjetër.

Në këtë këndvështrim, problemi me skuadrën e Simone Inzaghit është se, në krahasim me të kaluarën, filtri i mesfushës mungon pak. Për pasojë, edhe mbrojtësit kalojnë në krizë ndonjëherë”.