Në një përpjekje për të shpëtuar nga skandali i mikrokredive abuzive që u denoncuan gjatë këtij viti, Banka e Shqipërisë ka përgatitur një rregullore të re të ndryshuar, që synon të kufizojë dhe limitojë dhënien e kredive të vogla për njerëzit në nevojë për para të shpejta.

Rregullorja e Bankës së Shqipërisë, “Për administrimin e rrezikut në veprimtarinë e subjekteve financiare jobanka”, shtrëngon kushtet e kredidhënies nga institucionet financiare të mikrokredive.

Ndryshimi kryesor është se një institucion financiar jobankë nuk do të lejohet më që të japë në të njëjtën kohë më shumë se dy kredi konsumatore për të njëjtin huamarrës.

Ndryshim tjetër është limiti i kredisë bazuar në të ardhurat e një huamarrësi. Është vënë një vlerë tavan e kësteve të kredisë në raport me të ardhurat mujore neto të huamarrësve.

Sipas ndryshimit, këstet nuk mund të jenë më shumë se 40 për qind e të ardhurave mujore të klientit.

Shtrëngim ka dhe në dokumentacionin për dhënie kredish. Nëse deri tani mund të marrësh kredi dhe online, edhe vetëm me kartë identiteti, ndryshimet sjellin një varg procedurash të ngjashme me ato të bankave.

Sipas rregullores së re jobankat nuk mund të lidhin kontrata të kredisë konsumatore gjatë fashës orare 22:00 deri në 07.00.

Ekspertët mendojnë se rregullorja e re pritet të godasë kryesisht biznesin e kredive të shpejta.

Klienti duhet të provojë me letra se ka aftësi paguese ndërsa jobanka duhet të verifikojë aftësinë paguese dhe profilin e rrezikut të kredimarrësit, bazuar në të dhëna të mjaftueshme, të sakta dhe të përditësuara.

Rregullorja parashikon dhe kufizime të tjera. Personat nga 16 deri 18 vjeç nuk lejohen të marrin kredi në çfarëdo shume.

Gjithashtu nuk lejohet tu jepen kredi personave me aftësi të kufizuara, ose personave që marrin vendime nën asistencën e një personi tjetër. /noa.al