Izraeli nuk po përballet me presion të mjaftueshëm për t’i dhënë fund luftës në Gaza dhe përshkallëzimi në Liban është një fushë e minuar të cilën komuniteti ndërkombëtar mund të mos jetë në gjendje ta trajtojë, tha të hënën ministri i Jashtëm i Greqisë, citon noa.al.

Greqia u zgjodh sivjet anëtare e Këshillit të Sigurimit të Kombeve të Bashkuara për 2025-2026 dhe Athina beson se lidhjet historike të vendit me botën arabe dhe Izraelin i japin besueshmëri për të vepruar si ndërmjetës i paqes.

"Nuk ka presion efektiv mbi Izraelin. Ne jemi miq të Izraelit, jemi partnerë strategjikë të Izraelit dhe po përpiqemi të jemi sa më të hapur dhe të sinqertë me ta", – tha MPJ George Gerapetritis në një intervistë sot me Reuters në margjinat e Asamblesë së Përgjithshme të Kombeve të Bashkuara.

Greqia dënoi sulmin e 7 tetorit nga militantët islamikë të Hamasit kundër Izraelit, por ka bërë thirrje për ndalimin e sulmit tokësor dhe ajror të Izraelit në Gaza, që ka vrarë më shumë se 41,000 njerëz dhe ka rrafshuar qytete të tëra.

"E vërteta është se për momentin ka një reagim të vazhdueshëm, shumë të fortë nga ana e Izraelit," tha MPJ grek pas një takimi me ministrat e Jashtëm të Bashkimit Evropian dhe arabë.

Gerapetritis tha se është thelbësore që arabët dhe evropianët të ndjekin nisma të përbashkëta dhe jo të ndryshme që mund të rëndojnë mbi Izraelin, por shtoi se përshkallëzimi në kufirin Izrael-Liban të ditëve të fundit tregoi një dështim kolektiv ndërkombëtar.

“Ne nuk e kemi parandaluar përhapjen dhe sa më shumë të shpërndahet lufta, aq më e ndërlikohet bëhet situata për t’u zgjidhur”, tha ai. "Libani mund të jetë lehtësisht një zonë armiqësie të jashtëzakonshme dhe kjo është diçka që ne nuk mund ta përballojmë. Është një fushë qartësisht e minuar."

Që nga qershori, Greqia ka kërkuar të bindë vendet anëtare në Evropë që t’i bashkohen një projekti për të sjellë përkohësisht në Bashkimin Evropian fëmijët e lënduar dhe të traumatizuar nga lufta në Gaza. Greqia u ofrua të marrë rreth 500 fëmijë nga ana e saj. /noa.al