MAL I ZI- Për herë të parë për komunitetin shqiptar në Malin e Zi nisi të funksionojë biblioteka me zë në gjuhën shqipe, e cila ka për qëllim promovimin e leximit dhe edukimit përmes kësaj forme, veçanërisht për ata që kanë vështirësi me shikimin. Projekti synon të ruajë dhe të promovojë gjuhën dhe kulturën shqiptare, duke inkurajuar më shumë të rinj dhe të rritur të përfshihen në botën e literaturës.

Për herë të parë për komunitetin shqiptar në Malin e Zi nisi të funksionojë biblioteka me zë në gjuhën shqipe, e cila ka për qëllim promovimin e leximit dhe edukimit përmes kësaj forme, veçanërisht për ata që kanë vështirësi me shikimin.

Autorja Luljeta Avdiu Cura thotë se në këtë projekt janë përfshirë autorët shqiptarë nga Mali i Zi, për tu zgjeruar më vonë edhe me autorët tjerë nga rajoni.

“Projekti Biblioteka me zë, siç e kam titulluar “Audio vepra shqip” është një projekt i rëndësishëm te shqiptarët në Malin e Zi për vet faktin se do të publikohen audio libra të krijuesve nga shqiptarët e Malit të Zi, por edhe të autorëve tjerë nga rajoni. Qëllimi i këtij projekti është të edukohen të rinjtë dhe të rejat brenda vendit por edhe i dedikohet bashkëatdhetarëve, të cilët janë duke i rritur dhe edukuar fëmijët në diasporë”, tha zonja Cura.

Zonja Cura, vë në dukje, se projekti synon të ruajë dhe të promovojë gjuhën dhe kulturën shqiptare, duke inkurajuar më shumë të rinj dhe të rritur të përfshihen në botën e literaturës.

“Ka humbur dëshira te brezi i ri për të lexuar libër në formën tradicionale dhe me që ata tërë kohën kanë qasje në mjetet e ndryshme të teknologjisë, ky fakt mundësoi edhe bibliotekën me zë duke besuar se kurreshtja i bën të ndëgjojnë libra të këtij zhanri”, tha autorja e projektit.

Zonja Cura mendon se projekti nuk do të ketë fund dhe do të mbështetet nga institucionet përkatëse për ta zhvilluar këtë formë të edukimit.

“Ky është një projekt që nuk ka fund dhe shpresoj të përkrahet në vazhdimësi nga Fondi i Pakicave të Malit të Zi apo edhe nga institucionet tjera, të cilat e duan fjalën e shkruar”, tha zonja Cura.

Vlera e leximit në zhvillimin personal dhe arsimor është e madhe dhe librat me zë, sipas zonjës Cura ofrojnë një mënyrë të re për të përvetësuar njohuri, veçanërisht për ata që kanë vështirësi me shikimin, por edhe për ata që preferojnë të dëgjojnë përmbajtje gjatë aktiviteteve të tjera./VOA