Kombëtarja U-21 po përgatitet për takimin ndaj Zvicrës në transfertë, sfidë e vlefshme për kualifikueset e Kampionatit Europian “Sllovaki 2025”.

Ashtu siç është bërë e ditur, mbrojtësi Adrian Bajrami është bashkuar me Kombëtaren A. Gjithashtu, për ndeshjen ndaj Zvicrës, trajneri Bushi nuk do të ketë në dispozicion edhe mesfushorin Dejvid Janaqi dhe sulmuesin Cristian Shpendi, për arsye dëmtimi.

Sakaq, trajneri Alban Bushi ka thërritur futbollistin Ardit Nikaj për t’u bashkuar me Kombëtaren U-21. Sulmuesi është vendosur menjëherë në dispozicion të skuadrës kuqezi dhe do të jetë i gatshëm për të dhënë kontributin e tij ndaj Zvicrës U-21.

Gjendja e pjesës tjetër të skuadrës është e mirë, të gjithë lojtarët kanë marrë ngarkesën e plotë në seancat stërvitore. Ndeshja Zvicër-Shqipëri (U-21) do të luhet në stadiumin “Stade de la Tuilière”, më 6 shtator, në orën 19:30.