Patrice Evra, ish-futbollisti i kombëtares franceze dhe i disa klubeve të njohura në kontinent, është dënuar me kusht, si dhe me 4 mijë euro gjobë për dëmin moral ndaj ish-partneres së tij, Sandra Evra.

Sipas “Le Parisien”, Gjykata Penale e komunës së Nanterre e dënoi me 12 muaj burg ish-mbrojtësin francez. Gjykata e cilësoi të provuar braktisjen e familjes nga Patrice Evra, i cili ka luajtur me “Les Bleus” 81 herë, si dhe ka përfaqësuar skuadra të tilla si Monaco, Manchester United apo Juventus gjatë karrierës.

Sandra, 42 vjeçe, dhe Patrice Evra, 43 vjeç, u martuan në vitin 2007 dhe kanë dy fëmijë së bashku. Në korrik 2020, tabloidi britanik “Daily Mail” zbuloi fotografi komprometuese të ish-futbollistit me modelen daneze Margaux Alexandra, me të cilën do të martohej përfundimisht dhe ka sjellë në jetë dy fëmijë të tjerë. Sandra Evra ka bërë menjëherë procedurat e divorcit në gjykatën franceze, por procesi është ende në vazhdim.

“Shpresoj që me këtë vendim, Patrice Evra ta kuptojë se nuk është mbi ligjin dhe nuk mund t’i braktisë gruan dhe fëmijët e vet brenda natës. Si mund ta bëjë këtë ndaj ish-partneres, me të cilën u takua në moshën 15-vjeçare dhe ajo e shoqëroi në të gjithë botën, për ta mbështetur në karrierën futbollistike”, tha gjyqtarja Nathale Dubois.

Kjo e fundit shpjegoi gjithashtu se ish-lojtari francez detyrohet të paguajë rreth një milion euro kuotë ushqimore për braktisje të familjes 4 vite më parë. Patrice Evra nuk ishte i kënaqur me vendimin dhe avokati i tij, Jérôme Boursican, siguroi se do ta apelojë, pasi, sipas tij, Evra i ofroi ish-gruas një shtëpi luksoze me pishinë në jug të Francës, gjithashtu edhe dy milionë euro për shpenzime korente”.