Macja ka një personalitet të veçantë që ne duhet ta respektojmë dhe, natyrisht, ta pranojmë natyrën e saj.

Ajo është një kafshë që pranon përkëdheljet. Thjesht, i pranon vetëm kur të dojë dhe në pjesë të veçanta të trupit.

Pra, le të zbulojmë se çfarë nuk i pëlqen maces, por edhe çfarë nuk duhet t’i bëjmë asaj.

Banjo

“Macja është një nga kafshët më të pastra, pasi kujdeset vetë për leshrat e saj. Dhe, sigurisht, nuk ka një marrëdhënie shumë të mirë me ujin. Pra, nuk është aspak e lehtë ta lash.

Rrallëherë ka mace që pranojnë të lahen dhe këto janë ato që e kanë mësuar që në moshë shumë të vogël. Sigurisht që kur marrim një kotele të vogël dhe i bëjmë banjë, ajo do të reagojë shumë fort derisa të mësohet”, sqaron veterinerja, Ana Bardani.

Qethje

Sipas veterineres, ne nuk i qethim macet. Për të shkurtuar leshrat e një maceje, ajo duhet të jetë racë me leshra të gjatë. Por duhet ta krehim atë rregullisht.

Kthetrat e maces

“Duam t’i presim thonjtë maces kur ajo jeton brenda shtëpisë, që të mos na dëmtojë orenditë ose dhe të na gërvishë.

Sidoqoftë, macja, në përgjithësi, ka nevojë për kthetrat e saj, pasi mbështetet në to. Pra, nëse kemi një mace që ka akses në oborr apo ballkon, është mirë të mos ia presim. Sepse nëse ngjitet në kangjellat e ballkonit dhe rrëshqet, nuk do të mund të mbajë dot veten me kthetrat e saj”, thekson veterinerja.

Ajo shpjegon se macja nuk mund të perceptojë se i janë prerë kthetrat. Në këtë mënyrë, nëse bie, nuk do të jetë në gjendje ta mbajë veten.

Prandaj, thekson zonja Bardani, ia presim thonjtë vetëm kur ajo jeton gjithmonë në shtëpi.

Udhëtimet

“Nuk është aq e lehtë të ecësh me një mace sa të ecësh me një qen. Ajo duhet të jetë mësuar me këtë që në moshë shumë të re, dhe jo të gjitha kotelet janë të afta ta bëjnë.

Macja, pa marrë parasysh sa marrëdhënie të mira ka me pronarin e saj, është një kafshë shumë e friksësuar. Ka disa që janë shumë të pasigurta, dhe nuk mund të dalin për shëtitje”, shpjegon zonja Bardani.

Ajo gjithashtu tregon se nëse çlirohet nga zinxhiri, mund të zhduket, të shkojë poshtë një makine, të ngjitet në një pemë. Dhe nuk kapet. Nuk na vjen macja kur e thërrasim, si qeni që të vjen direkt pranë.

Pastrim dentar

“Është më e lehtë të pastrojmë dhëmbët e maces nëse e mësojmë që në moshë të vogël. Për higjienën e saj orale përdorim pastë dhëmbësh të veçantë dhe furçë dhëmbësh (të butë). Produkte që gjenden në dyqanet e kafshëve shtëpiake. Nuk duhet të përdorim produktet tona”, thekson znj. Bardani.

Megjithatë, pastrimi i dhëmbëve të maces është… i pamundur.

“Macja nuk ulet që ne t’i hapim gojën dhe t’i pastrojmë dhëmbët. Ndaj duhet të ishte mësuar me këtë që në moshë shumë të re. Por është jashtëzakonisht e rrallë që një pronar të ketë arritur të lajë dhëmbët e maces së tij”, thotë zonja Bardani.

Përkëdheljet

“Macja është një kafshë që pranon përkëdheljet. Thjesht, ajo i pranon vetëm kur të dojë dhe në pjesë të veçanta të trupit të saj.

Për shembull, asaj i pëlqen shumë në kokë dhe përgjatë shtyllës kurrizore. Ka mace që absolutisht nuk duan që ne t’u përkëdhelim barkun. Kur shkojmë t’i përkëdhelim, ato mund të na kapin me këmbë, kthetra ose gojë dhe na kafshojnë keq. Pra, duhet vëmendje”, thotë zonja Bardani.

Mustaqe

Mustaqet e maces, nënvizon zonja Bardani, nuk duhen prerë doemos, sepse janë organe shqisore.

Transporti

“Një problem tjetër që kemi me kotelet është transportimi i tyre me kafaz. Ose për t’i çuar në zyrën e mjekut apo në një shtëpi tjetër, ose kudo tjetër.

Macja nuk është shumë e lehtë të futet në kafaz. Sidomos një mace që nuk është mësuar me këtë”, thotë zonja Bardani.

Kafazi apo çanta e transportit, siç thekson veterinerja, është e domosdoshme dhe ne gjithmonë duhet ta transportojmë kotelen tonë me të.

“Gjëja e duhur është ta mbajmë brenda në kafaz dhe jo ta kemi në krahë. Nuk duhet ta lëmë të lëvizë nëpër makinë, apo ta mbajmë në duar. Është shumë e rrezikshme, sepse mund të aktivizojë fuqitë e saj dhe të bëhet një aksident. Mund të shkojë te shoferi – në fytyrën e tij, te pedalet, kudo. Pra, sado e mirë të jetë kotelja jonë, sado e vjetër të jetë, ajo transportohet me çantën apo kafazin e vet”, thekson veterinerja.

Ambientimi me kafazin e transportit

Kur kemi një takim të planifikuar me mjekun ose një udhëtim, siç thotë veterinerja, është mirë ta kemi kafazin të hapur disa ditë më parë. Le ta lëmë derën hapur dhe të vendosim një shilte në të. Kështu ajo do të jetë në gjendje të hyjë dhe të dalë, të flejë, të marrë aromat e saj.

“Në këtë mënyrë, kur të përpiqemi ta fusim kotelen në kafaz, do të jetë më e lehtë. Sepse kur macja sheh papritur një hapësirë ​​të mbyllur dhe të ngushtë, dhe ne shkojmë ta vendosim me forcë brenda, mund të na kafshojë. Dhe nuk do mundeni ta kapni dhe ta futni në kafaz. Shumë herë kjo ka ndodhur. Pra, ne duhet ta ambientojmë macen tonë me kafazin”, thotë zonja Bardani.

Si ta vendosim macen në kafaz?

Sipas veterineres, kurrë nuk e shtyjmë kafshën tonë me fytyrën e saj përballë kafazit. E vendosim me pjesën e pasme të trupit, që të mos shohë se po hyn në një hapësirë ​​të mbyllur e të errët. Dhe mbyllim shpejt derën.

Macja ka nevojë për lëvizje të shpejta, siç shpjegon veterinerja, sepse mund të zhduket lehtësisht. Dhe pastaj, është e vështirë për ta kapur.

Zona e rërës

“Macja, duke qenë një kafshë e pastër, dëshiron që edhe vendi ku del jashtë të jetë i pastër. Pra, nuk e lëmë të kalojnë nja 24 orë për ta pastruar, sepse ajo do të gjejë vende të tjera për të kryer jashtëqitje”, thekson veterinerja.

Është mirë, ta pastroni rërën një ose dy herë në ditë. Nëse kemi më shumë kotele, do të na duhet të vendosim më shumë kuti me rërë. Sepse nëse kemi vetëm një, sigurisht që nuk do të shmangim aksidentin e urinimit apo feçeve në vende që nuk duam. /noa.al