![](https://noa.al/newsImages/2024/06/bujar.jpg)
Këngëtari dhe artisti shkodran, Bujar Qamili ka rrëfyer momentet më të vështira të jetës së tij, kohën kur u infektua me Covid dy vite më parë, duke qëndruar 21 ditë në koma.
Ai kishte një falënderim të veçantë për djalin e tij, i cili i ka qëndruar pranë për ditë me radhë në spital.
“Kanë qenë ditët më të tmerrshme të jetës sime”, tha artisti.
“Unë e mora Covid-in në Shqipëri dhe ika direkt në Itali. Mbaj mend 3-4 ditët e para, që isha i shtruar në spital. Pastaj, nuk di gjë në botë çfarë ka ndodhur me mua. Asgjë! Madje, kur e mora veten pas 21 ditëve, që a po shkoj a po rri, po më duket se Zoti më pa mirë dhe tha rri dhe pak se i duhesh një fije. Gjëja më e bukur, kur e kam pyetur djalin, që për mua ishte një shpëtimtar se më qëndroi në kokë 21 ditë, me ato veshjet e Covid. E falënderoj shumë dhe i jam shumë borxhli” tha artisti në një intervistë për “S’e Luan Topi”.
Bujar Qamili kujton çastet e para kur u zgjua nga koma dhe bisedën me të birin.
“Unë shihja një dritë bezhë, ishte si perde. Fillova duke dëgjuar ca zëra kur po dilja nga koma. Kthej kokën dhe shoh djalin, nuk kam lënë fjalë pa e sharë, i thosha si më le këtu. Kur të bëhesh më mirë do flasim më thoshte. Bush, më tha, të kalojë kjo punë, po një gjë është e mirë, që ti nuk ke ditur asgjë në botë se çfarë ka ndodhur”, ka treguar Bujar Qamili
Bashkohu me kanalin e NOA WhatsApp për lajmet më të fundit direkt në celularin tënd