![](https://noa.al/newsImages/2024/06/640-0-1718431006xaki-118.png)
KOSOVA- Policia e Kosovës, pas informacioneve të pranuara nga Agjencia e Kosovës për Inteligjencë, ka gjetur dhe sekuestruar dje një sasi armatimi në veri të Mitrovicës, që ishte fshehur nga ish-pjesëtarët e grupit terrorist që kryen sulmin në Banjska më 24 shtator të vitit të kaluar. Ushtruesi i detyrës së drejtorit të policisë për rajonin e veriut, Veton Elshani, gjatë një konference për media ku janë ekspozuar armët e gjetura dhe të konfiskuara, ka bërë të ditur se armatimi dhe pajisjet tjera të gjetura dyshohet se kanë qenë aty për një kohë të gjatë. Ai ka thënë se dy të dyshuarit për rastin e Banjskës, Zharko Cvetkoviç dhe Marijan Radojeviç, e që janë në kërkim.
“Që të dyja lokacionet kanë emra, lokacioni i parë lidhet me emrin Marijan Radojeviç, ndërsa lokacioni i dytë ndërlidhet me Zharko Cvetkoviç… dhe që të dytë janë në kërkim për rastin e Banjskës… Ne konsiderojmë se ky armatim dhe këto pajisje ndodhen aty për një kohë më të gjatë”, ka thënë Elshani.
Nga armatimi i prezantuar ka armë të gjata të kalibrave të ndryshme, pistoleta, granata dore etj. Lokacioni i parë është në veri të Mitrovicës, ku anë gjetur tri armë të gjata AK-47, katër karikatorë me 60 fishekë, një krehër me 11 fishekë, një këllëf revoleje, një çantë ushtarake.
Ndërsa në vendndodhjen e dytë janë gjetur një rrip brezi me 25 fishekë për armë gjuetie, 23 fishekë për armë gjuetie, pistoletë TT me një karikator me tetë fishekë, tre karikatorë me nga tetë fishekë, dy karikatorë në fotrollë, 28 fishekë për armë të gjata, 10 krehër me fishekë të armës së gjatë (99 fishekë), një kuti me fishekë 7×62, katër pastruese të armës, kuti me lëndë të dyshimtë.
Në vendndodhjen e tretë janë gjetur armë e gjatë me bajonetë, një pistoletë me dy karikatorë me nga tetë fishekë 7×62 dhe një fotrollë, çantë e zezë me pajisje për pastrim të armës, dy kuti me nga 50 fishekë 7×62, tre karikatorë me fotrolla me nga tetë fishekë, armë e gjatë gjuetie me çantë.
Bashkohu me kanalin e NOA WhatsApp për lajmet më të fundit direkt në celularin tënd