Golashënuesi më i mirë në historinë e Shqipërisë, pavarësisht se doli në “pension” 11 vite më parë, Erjon Bogdani, i lindur në vitin 1977, u intervistua nga mediat italiane. Ish-sulmuesi i disa skuadrave italiane iu përgjigj disa pyetjeve në lidhje me debutimin e kombëtares së tij kuqezi kundër axurrëve të Luciano Spallettit, i planifikuar për nesër në orën 21:00 në Dortmund:

"Në futboll gjithçka është e mundur, luhet 11 kundër 11. Ne e nisim si ‘underdog’, ndërsa Italia, kampionia në fuqi e Evropës, gëzon të dobëtit. Megjithatë, presioni është mbi axurrët, sepse kanë gjithçka për të humbur, ndryshe nga ne që kemi gjithçka për të fituar.

Lojtarët tanë e dinë çdo sekret të kombëtares italiane, duke qenë se pothuajse gjysma e të grumbulluarve për këtë Europian luajnë ose kanë luajtur në Itali”. I pyetur se cilin lojtar do të donte t’ia hiqte skuadrës së Spallettit, përgjigja e Bogdanit është e menjëhershme: “Barella, pika kryesore e lojës së axurrëve”.

Erjon Bogdani, cili nga kjo kombëtare e Shqipërisë mund ta thyejë rekordin tuaj?

Sot është Armando Broja, prototipi i sulmuesit modern. I ri, por tashmë me shumë eksperiencë. Ai ka luajtur për Chelsea, në Holandë me Vitesse, ka grumbulluar përvojë në Premier League. Ai është shumë i mirë.

Por rekordi juaj i golave është ende aty, prej 11 vitesh…

Sulmuesit që erdhën pas meje nuk luajtën me të njëjtën vazhdimësi. Ne jemi një kombëtare në rritje, kjo na bën të ngremë stekën, të konkurrojmë kundër ekipeve gjithnjë e më të forta.

Çfarë i mungon Brojës për t’u konfirmuar në nivele të larta?

Vazhdimësia. Ai është frenuar nga disa dëmtime të shumta, por ka mjaft kohë për t’u rikuperuar. E mbron topin mirë, në situatat një kundër një ka forcë dhe driblim, është një lojtar i fuqishëm.

Si po përgatitet Shqipëria për ndeshjen kundër Italisë?

Është një ndeshje e veçantë për të gjithë vendin, unë do të jem në Dortmund për të bërë tifo kombëtaren kuqezi. Kam 24 vite në Itali, gruaja dhe fëmijët e mi janë italianë dhe dinë pak për Shqipërinë. Do të doja të kisha qëndruar në shtëpi, sepse do ta kisha gjetur veten mes tifozëve italianë (buzëqesh). Ka një lidhje të thellë mes këtyre dy kombeve, në Shqipëri nuk jemi më si në vitet ’90. Kur jemi gjendur në vështirësi, Italia na ka ndihmuar gjithmonë. Tani po i ndihmojmë edhe ne, me kalimin e viteve ka gjithnjë e më shumë italianë në Shqipëri.

Pse mund t’ia dalë Shqipëria?

Për shkak se me Sylvynho jemi rritur shumë si kombëtare. Ne mundëm Poloninë dhe Republikën Çeke për t’u kualifikuar të parët në grup. Kemi një ekip shumë kompakt, trajneri ishte i zoti për ta mbajtur stekën lart. Kushdo që hyn në fushë nga pankina dëshiron të demonstrojë më të mirën. Të gjithë mbrojnë, kemi lojtarë fantastikë që gjuajnë mirë edhe nga larg. Shqipëria është një ekip i kompletuar dhe kur dalin në fushë mund të shohësh se kuqezinjtë luajnë në mënyrën më të mirë.

Mes tyre është edhe Asani, i cili vjen nga Koreja e Jugut…

Ai është i sigurt, së fundi me Shqipërinë ka mundur të bëjë gjithçka. Është lojtar shumë i shpejtë, ka gjuajtje shumë të mirë. E njoh mirë, ka luajtur për Partizanin e Tiranës, me të cilin ka fituar kampionatin.

Jeni etiketuar si “Hirushja” e grupit…

Është një grup shumë i komplikuar, por më i balancuar nga sa mund të mendoni. Ata që nuk kuptojnë shumë nga futbolli e vendosin Shqipërinë në vendin e fundit, por nëse të tjerët na nënvlerësojnë, do ta gjejnë veten në vështirësi. Ky ekip nuk ka asgjë për të humbur, por nuk do të thotë se do të dalë në fushë me armë të ftohta.

Cilët janë liderët e kombëtares suaj?

Djimsiti, Hysaj, edhe portierët janë me shumë eksperiencë. Por kujdes mesfushorët: Asllani, Ramadani dhe Bajrami janë lojtarë të mëdhenj. Kjo është një skuadër që di të menaxhojë posedimin e topit dhe gjithashtu të vuajë.

Çfarë momenti po përjeton sot kombëtarja shqiptare?

Moment të shkëlqyer. Strukturat janë përmirësuar, është një kombëtare që lë gjurmë edhe ndaj ekipeve të forta. Jam shumë pozitiv për ndeshjen e parë kundër Italisë, jemi afër edhe për nga vlerat.

A do të flisni me lojtarët aktualë para ndeshjes?

Ndoshta po, do të shohim. Unë patjetër do t’i dërgoj disa mesazhe Djimsitit dhe Berishës, lojtarë ekspertë që i njoh mirë. Jemi të gjithë me ta.

A mund ta kaloni grupin?

Duhet t’i mbajmë këmbët në tokë. Unë flas mirë për Shqipërinë jo sepse jam një tifoz, por sepse faktet e thonë këtë. Megjithatë, është një grup shumë i vështirë. Për mendimin tim jemi afër Italisë për nga vlerat, por të mos harrojmë që Italia është Italia. Axurrët e fituan Kampionatin e fundit Europian.