![](https://noa.al/newsImages/2024/06/Screenshot_20240613_113113_Chrome.jpg)
Ambasadori amerikan Christopher Hill tha se mendon se Serbisë nuk do t’i kërkohet njohja de jure e Republikës së Kosovës si kusht për hyrje në BE, por marrëdhënie normale mes Beogradit dhe Prishtinës.
"Ajo që evropianët kërkojnë është pikërisht ajo që thonë se po kërkojnë, që është normalizimi. Ata duan paqe dhe siguri në rajon, dhe sigurisht mes Kosovës dhe Serbisë," tha Hill në një intervistë për NIN, që citon noa.al.
Ai madje tha se Marrëveshja e Ohrit nuk parasheh njohjen de jure të Kosovës.
Ambasadori theksoi se mendon se është koha që të zbatohet ajo që është vendosur 11 vjet më parë.
Marrëveshja e Ohrit vërtet përcaktoi disa fusha në të cilat duhet të fokusohet, e njëra prej tyre është nevoja për të krijuar një Bashkësi të Komunave Serbe, tha Hil duke shtuar se normalizimi është diçka për të cilën mund të punohet, por në kontekstin e rajonit.
Hill përforcoi bindjen se nuk është e domosdoshme që Serbia të njohë zyrtarisht Kosovën kur përmendi se edhe pesë shtete të BE nuk e njohin atë.
“Mendoj se ata e kanë thënë shumë qartë se ka anëtarë të BE-së që nuk e njohin Kosovën, kështu që çështja e vërtetë është të përpiqemi të arrijmë normalizimin ku kufijtë nuk do të jenë kufij që ndajnë, por kufij që bashkojnë, kufij që bashkojnë realisht”, tha Hill.
Ai vlerësoi se Serbia dhe SHBA kanë një dialog shumë të mirë, por shtoi se Uashingtoni dhe Beogradi nuk pajtohen për gjithçka.
"Ne nuk pajtohemi për Kosovën, por jemi dakord për domosdoshmërinë e paqes dhe sigurisë në Evropë. Ne gjithashtu pajtohemi shumë mirë që agresioni rus kundër Ukrainës duhet të ndalet" tha Hill.
Kur u pyet për mos vendosjen e sanksioneve nga Serbia ndaj Rusisë, Hill tha se SHBA dëshiron që Serbia t’i bashkohet sanksioneve, por shtoi se tashmë Beogradi ka ndërmarrë hapa të rëndësishëm për t’ia bërë të qartë Rusisë se nuk pajtohet me agresionin kundër Ukrainës.
“Kështu që unë mendoj se kemi një mirëkuptim të mirë me Serbinë”, tha Hill dhe shtoi se pjesën e harmonizimit me BE-në do t’ua lërë bisedimeve që Beogradi po zhvillon me evropianët.
"Ajo që është e rëndësishme për ne tani është se Serbia e ka bërë të qartë se ku qëndron në raport me Ukrainën," tha Hill.
I pyetur nëse BE-ja do të reduktonte tensionet në Ballkanin Perëndimor duke pranuar anëtarësimin e të gjithë rajonit, duke pasur parasysh edhe ndikimin rus dhe kinez dhe nëse kjo është e mundur pa SHBA-në, Hill u përgjigj se BE-ja i merr vendimet vetë dhe se kur një vend dëshiron të bëhet anëtar, SHBA-të e mbështesin, gjë që e bëjnë edhe me Serbinë.
Ai shtoi se Serbia ka gjëra që duhet të bëjë në fushën e sundimit të ligjit.
Në përgjigje të komenteve se është i butë ndaj presidentit serb Aleksandar Vuçiq, Hill deklaroi se beson se çdo diplomat i huaj shkon në një vend dhe bashkëpunon me përfaqësuesit e atij vendi dhe se do të vazhdojë bashkëpunimin me Vuçiqin derisa ai të jetë president i Serbisë.
Hill tha se ishte i zhgënjyer kur pa sërish Aleksandar Vulin dhe Nenad Popoviqin në Qeverinë e Serbisë.
Ambasadori tha gjithashtu se kurrë nuk do t’i kërkonte popullit të Serbisë të injorojë të kaluarën dhe të harrojë bombardimet e NATO-s, por gjithashtu përsëriti se mendon se për hir të brezave që do të vijnë, duhet të përpiqemi të kalojmë më shumë kohë duke parë nga e ardhmja sesa të shihet vetëm pas. /noa.al
Foto: Tanjug
Bashkohu me kanalin e NOA WhatsApp për lajmet më të fundit direkt në celularin tënd