Pas një të marte plot tension, pritet që këtë të mërkurë, më 29 maj, të inaugurohet një “skenë” e re te Barça. Gjermani Hansi Flick do të shpallet zyrtarisht si trajneri i ri i Barçës, pasi presidenti i klubit të mbyllë përfundimisht largimin e Xavi Hernández.

Sezoni zyrtar i klubit Blaugrana përfundoi të dielën, me fitoren e parëndësishme në “Sánchez-Pizjuán”, pasi vendi i dytë në La Liga ishte siguruar tashmë. Në klubin katalanas tashmë po punojnë 100% mbi planifikimin sportiv për sezonin e ardhshëm. Tani e tutje, Hansi Flick do të punojë së bashku me Deco de Souza, drejtor sportiv, për të ndërtuar skuadrën e re.

Sipas “As”, Xavi Hernández ka refuzuar një propozim për të qenë trajner i kombëtares së Koresë së Jugut. Në derën e trajnerit katalanas kanë trokitur edhe Ajax, Manchester United e Milan. Ideja e tij, siç është shprehur në disa raste, është të bëjë një pushim dhe më pas të vlerësojë opsionet që ka për të vazhduar të stërvisë diku tjetër.

Edhe pjesa tjetër e stafit, pra asistentët që e kanë shoqëruar Xavin që nga fillimi i karrierës si trajner, edhe në Katar, do të marrin pushim, duke pritur që ish-mesfushori blaugrana të vendosë për një nga propozimet që ka në tryezë.

E ardhmja – E sigurt është se Xavit nuk do t’i mungojnë ofertat. Në fakt, sapo shpalli dorëheqjen e tij të vonuar në fund të janarit, një klub si Ajaxi i Amsterdamit pyeti për të ardhmen e tij dhe mundësitë për të marrë përsipër sfidën te “harkëtarët”. Personi që e kontaktoi ishte Jordi Cruyff.

Lista e klubeve që kanë trokitur në derën e Xavit është shumë më e gjerë. Trajnerin e testuan edhe klube të tjera të traditës së Manchester United dhe Milani, edhe pse në të dyja rastet në mënyrë shumë informale.

Tani, oferta më e çuditshme që Xavi ka në tavolinë është ajo e një kombëtareje. Konkretisht, nga Koreja e Jugut, që mendon për Kupën e Botës 2026. Nuk është hera e parë që një kombëtare i troket në derë. Kur ishte ende trajner i Al Sadd-it, ai mori një propozim të çuditshëm nga Brazili, pasi i ofruan postin e ndihmësit të Tite deri në Kupën e Botës "Katar 2022" dhe më pas të merrte frenat e “Seleçaos”.

Në çdo rast, për momentin Xavi nuk është i disponueshëm për t’iu bashkuar ndonjë klubi, synimi i tij është të bëjë disa kohë pushim. Me tutat e trajnerit në fushë do të kthehet në verën e vitit 2025, duke ndjekur kësisoji "gjurmët" e Jurgen Klopp. Edhe ky i fundit pati shumë oferta, por vendosi të pushojë sezonin e ardhshën, pas largimit nga Liverpool.

Për momentin, ai nuk ka asnjë preferencë, por duket se tërhiqet nga Premier League. Në parim, La Liga është një vijë e kuqe që nuk duhet kaluar, pasi nuk dëshiron të konkurrojë me Barcelonën, klub i jetës së tij. Sigurisht, askush të mos harrojë se PSG është një klub me pronar nga Katari, vend ku Xavi mbylli karrierën si futbollist dhe nisi atë të trajnerit.