Vendim tjetër në favor të Superligës Evropiane në betejën kundër UEFA-s dhe FIFA-s. Gjykata e Madridit ka vendosur se statutet e dy organeve drejtuese të futbollit, europian dhe botëror, që pengojnë konkurrentët të hyjnë në tregun ndërkombëtar të futbollit, janë të paligjshme dhe të papajtueshme me ligjin e konkurrencës së Bashkimit Evropian.

Në mënyrë të detajuar, vendimi flet për “shpërdorim të pozitës dominuese” dhe “pengim të konkurrencës së lirë në tregun e BE-së duke vendosur kufizime të pajustifikuara dhe disproporcionale”.

Është hera e parë që një gjykatë evropiane ka zbatuar kuadrin ligjor të nxjerrë nga Gjykata e Drejtësisë së Bashkimit Evropian (GJED) në dhjetor 2023 dhe për këtë arsye vendimi është i detyrueshëm dhe i zbatueshëm në të gjithë BE-në.

Një prononcim i qartë për këtë çështje, i cili ndoshta do të ketë pasoja të rëndësishme në të ardhmen e Superligës. Në vendim, gjykata urdhëroi FIFA-n dhe UEFA-n të "ndalojnë sjelljen anti-konkurruese", "të ndalojnë përsëritjen e saj në të ardhmen" dhe "të heqin të gjitha efektet e veprimeve anti-konkurruese që kanë ndodhur para ose gjatë kohëzgjatjes së procedurave".

Një qëndrim i mirëpritur me entuziazëm nga "A22 Sports Management", kompani e krijuar për të sponsorizuar dhe mbështetur krijimin e Superligës. "Ne mirëpresim vendimin e Gjykatës së Madridit, – shpjegoi CEO, Bernd Reichart. – Është hap i rëndësishëm drejt një peizazhi të vërtetë konkurrues dhe të qëndrueshëm të futbollit të klubeve në Evropë.

Për shumë kohë, UEFA-s i është lejuar të kontrollojë dhe dominojë futbollin e klubeve në nivel evropian. Statutet e UEFA-s dhe veprimet agresive të ndërmarra për të mbrojtur monopolin e saj kanë mbytur inovacionin për dekada dhe klubet nuk duhet të kenë frikë nga kërcënimet e sanksioneve, idetë dhe bisedat.

Epoka e monopolit ka përfunduar padyshim. Ne presim të vazhdojmë dialogun me klubet e të gjitha madhësive për të përmirësuar futbollin e klubeve në nivel ndërkombëtar dhe për ta bërë atë më të aksesueshëm e bindës për tifozët".