Dymbëdhjetë persona u plagosën pasi avioni Qatar Airways nga Doha në Dublin u godit nga turbulencat këtë të diel.

Fluturimi, i cili u ul në Dublin pak para orës 13:00 me orën lokale, u prit nga shërbimet e urgjencës, duke përfshirë policinë e aeroportit dhe departamentin e zjarrfikës.

Sipas një deklarate nga Aeroporti i Dublinit, gjashtë pasagjerë dhe gjashtë anëtarë të ekuipazhit u plagosën.

Fluturimi QR107 i Qatar Airways përjetoi turbulenca gjatë fluturimit mbi Turqi, thuhet në deklaratë.

Në fillim të kësaj jave, në një incident të ngjashëm, një britanik vdiq në një fluturim të Singapore Airlines pas turbulencave ekstreme në një udhëtim Heathrow-Singapore.

Turbulenca përkufizohet si një ndryshim i papritur në rrjedhën e ajrit dhe shpejtësinë e erës.

Shpesh mund të lidhet me retë e stuhisë, të cilat zakonisht parashikohen dhe monitorohen mirë, duke lejuar avionët të fluturojnë rreth tyre, thotë parashikuesi i motit të Sky News, Jo Robinson.