"Faleminderit dhe lamtumirë”, në këtë përmblidhet deklarata e Kylian Mbappe në kanalet e tij sociale. Ylli francez ka dalë në shesh, duke shpallur largimin nga PSG zyrtarisht, gjë që në fakt e dinin të gjithë. Në fund të këtij sezoni, pas 7 kampionateve të mbushura me gola dhe fitore, ai do të largohet nga parizienët: “Nuk do ta rinovoj kontratën time dhe kjo aventurë do të përfundojë në javët e ardhshme. Njoftoj se po largohem nga vendi im dhe Ligue 1. Kam nevojë për një sfidë të re pas 7 vitesh”.

Ja mesazhi i plotë i kampionit të botës më 2018, i cili pritet të transferohet si lojtar i lirë te Real Madridi: "Përshëndetje të gjithëve, unë dua të flas me ju. Gjithmonë kam thënë se do të flas me ju kur të vinte koha dhe kështu dua t’ju njoftoj se ky është sezoni im i fundit me PSG. Nuk do ta rinovoj kontratën time, kjo aventurë do të përfundojë në javët e ardhshme. Do ta luaj ndeshjen time të fundit në ‘Parc des Princes’ të dielën.

Kam shumë emocione, për 7 vite pata mundësinë dhe nderin të jem anëtar i klubit më të madh francez, gjë që më lejoi të arrij këtu, të kem përvojën time të parë në një klub me kaq presion dhe të rritem qartë, krahas disa kampionëve më të mëdhenj në histori. Edhe unë jam rritur si njeri, me gjithë lavdinë dhe gabimet që kam bërë.

Para së gjithash dua të falënderoj të gjithë shokët e skuadrës që kam pasur, të gjithë trajnerët: Emery, Tuchel, Pochettino, Galtier dhe Luis Enrique. Falënderoj drejtorët sportivë Leonardo dhe Luis Campos, që më kanë shoqëruar. Faleminderit të gjithë anëtarëve të klubit, që askush nuk i sheh, por meritojnë njohjen e duhur. E di që po e lë klubin në duar të shkëlqyera.

Nuk e mendoja se do të ishte aq e vështirë të njoftoja se po largohesha nga vendi im dhe Ligue 1, por më duhet një sfidë e re pas 7 vitesh. E di që nuk jam lojtari më demonstrues, por i falënderoj tifozët për gjithë dashurinë që më kanë dhënë në këto 7 vite.

PSG është një klub që nuk të lë indiferent: ose e do, ose e urren. Nuk jam penduar, është një klub që do ta mbaj mend gjatë gjithë jetës sime. Nuk do të luaj më këtu, por do të vazhdoj të shikoj çdo ndeshje, do ta ndjek akoma. Jam munduar të jap më të mirën nga vetja, i jam mirënjohës PSG për të gjitha emocionet që kam përjetuar. Tani duhet të ngremë trofeun e fundit”.

Mbappe iu bashkua PSG verën e vitit 2017 nga Monaco për një total prej 180 milionë eurosh. Në 7 sezone ai shënoi rreth 255 gola në 306 paraqitje, duke fituar 6 kampionate franceze, 2 kupa të ligës, 3 kupa franceze dhe 4 superkupa franceze.