Mattia Giani ndërroi jetë mëngjesin e sotëm në spitalin fiorentin “Careggi”. Lajm i trishtë për futbollin italian, por jo vetëm. Futbollisti 26-vjeçar pësoi kolaps shëndetësor pasditen e djeshme, në stadiumin komunal të Campi Bisenzio (Firence), gjatë ndeshjes së kampionatit mes Lanciotto dhe Castelfiorentino.

Sipas mjekëve, ai pësoi arrest kardiak në fushën e blertë, teksa po luante. Lojtari u sëmur në minutën e 14-të të pjesës së parë dhe u rrëzua përtokë. Situata u shfaq menjëherë shumë e rëndë. U dërgua me urgjencë në spital, por pavarësisht kujdesit të mjekëve, nuk ia doli dhe ndërroi jetë.

Pasi mësoi lajmin, kryetari i bashkisë Castelfiorentino (Firence), Alessio Falorni, shkroi në rrjetet sociale: "Për fat të keq më erdhi një lajm i tmerrshëm. Mattia nuk ia doli. Fjalët mungojnë patjetër në këto momente. Një tragjedi e tmerrshme. Një dhimbje zemërthyese. Ne mund të mblidhemi së bashku në një përqafim shumë të fortë me familjen dhe shoqërinë që ai i përket”.

Po dje, në Friuli, gjatë Udinese-Roma, mbrojtësi nga Bregu i Fildishtë, Evan N’Dicka, u sëmur dhe u ndihmua menjëherë nga mjekët në fushë. Lojtari i Romës tani është shtruar në spitalin “Santa Maria della Misericordia” në Udine dhe nuk ka rrezik për jetën, fatmirësisht.