Interi nuk shkoi përtej barazimit 2-2 në shtëpi kundër Cagliarit, një pengesë që vetëm i ndryshoi planet e zikaltërve për titullin. "E dinim se po përballeshim me një ekip të shëndetshëm, që nuk dorëzohet kurrë – komentoi Inzaghi në fund të ndeshjes. – Ne vuajtëm. Kundërsulmet e kundërshtarit ishin befasuese. Barazimi është zhgënjyes, sepse ne donim të fitonim para tifozëve tanë”.

Interi kaloi dy herë në epërsi, duke pësuar po aq gola, më shumë se zakonisht në këtë kampionat: “Lamë diçka në fushë, duhej të punonim më mirë në golin e parë. Goli i dytë ishte aksidental. Ne zakonisht punojmë më mirë në kundërsulmet, por gjetëm një ekip të shëndetshëm, që funksionoi mirë. Për këtë e përgëzoj Cagliarin".

Me këtë barazim, Interi nuk do të mund ta thyejë rekordin prej 102 pikësh në Serie A: "Gjëja për të cilën më vjen keq është që nuk fitova. Jemi afër titullit, por kemi ende 18 pikë përpara. Të qëndrojmë në rrugën e duhur”.

Në ndeshjen tjetër është derbi kundër Milanit, i cili mund t’i japë titullin, nëse ka sukses: "Do të ishim të lumtur ta fitonim titullin në derbi, ndaj do të përgatitemi sa më mirë që mundemi. Nëse e fitojmë të hënën, aq më mirë, përndryshe do të ketë raste të tjera. Është e qartë se Milani do të dëshirojë të bëjë më të mirën para tifozëve të vet”.

Përgatitja do të jetë e veçantë për një ndeshje që nuk është kurrë banale: “Do të punojmë si gjithmonë, do ta analizojmë këtë sfidë dhe më pas nga e mërkura do ta përgatisim ndeshjen derbi në mënyrën më të mirë të mundshme. E dimë se çfarë përfaqëson derbi tani dhe atë që ka përfaqësuar vitet e fundit, por do ta respektojmë gjithmonë Milanin”.