Personalitet dhe talent. I tillë ishte Kristjan Asllani në pasimin që dha për Lautaro Martinez, i cili "vulosi" ndeshjen në "Via del Mare". Një asist i shqiptarit, jo i pari i këtij sezoni, në të cilin Interi ka zbuluar se ka një "playmaker" të besueshëm, pas Calhanoglu të paprekshëm.

Hakan nuk është në dispozicion, por zikaltrit nuk po vuajnë. E përkthyer? Asllani po rritet dhe bën mirë. "Shenjtërimi" i "vëllait të vogël" nga turku, nëpërmjet rrjeteve sociale, është dëshmi e kësaj. “Vëllai im i madh, maestro”, – ishte përgjigja e shqiptarit.

Calhanoglu, nga pankina e "Via del Mare", duke vëzhguar performancën e ish-lojtarit të Empolit, do të ketë marrë frymë i lehtësuar. Roli i tij në fushë është i sigurt edhe pa të në dispozicion. Kush e di nëse do të jetë kështu edhe ndaj Atalantës, një test i rëndësishëm për rritjen e 21-vjeçarit shqiptar (ai do të mbushë së shpejti 22 vjeç, më 9 mars).

Kundër skuadrës së Gasperinit, në mungesë të turkut, do të jetë sërish radha e tij, duke pritur të kuptojë se kur Calhanoglu do të kthehet në "kullën e regjisë" zikaltër. Kjo është edhe arsyeja pse Inzaghi e zëvendësoi Asllanin, pasi mori kartonin e verdhë (të mos rrezikonte).

Të mërkurën, Interi nuk bën dot pa Kristjan, i cili këtë sezon është përgjigjur gjithmonë pozitivisht, kur është thirrur "nën armë". Në kampionat kishte startuar nga minuta e parë vetëm në Firence, duke u kthyer nga udhëtimi në Riad për Superkupën e Italisë. Aty, Asllani dhe Frattesi zëvendësuan Barella dhe Calhanoglu, të pezulluar.

Gjithçka po shkon sipas planit. Në verë, kur Interi vendosi të sakrifikonte Brozovic, duke u fokusuar te Calhanoglu si "playmaker", ideja ishte t’i jepte më shumë hapësira Asllanit, i cili u "kalb në stol" sezonin e kaluar nga konkurrenca e pamëshirshme në mesfushë.

Tani ai është atje, vetëm pas Hakan. Dhe aty-këtu, mes aktivizimeve si zëvendësues e mundësive si titullar (duke përfshirë dy herë  në Champions League dhe një në Kupën e Italisë), ai përgjigjet si duhet.

Kundër Lecce nxori në pah të gjithë personalitetin dhe besimin e tij për të luajtur një rol delikat. Shqiptari bëri shumë pak gabime (vetëm dy pasime të gabuara) dhe e asistoi Lautaro Martinezin te goli. Inzaghi nuk mund të kishte kërkuar asgjë më shumë nga udhëtimi në Lecce. Me Asllanin, tashmë Interi ka gjetur gjithashtu një "playmaker" rezervë të besueshëm.