Fatkeqësi për lojtarët e Fortaleza, pas barazimit ndaj Sport Recife në “Copa do Nordeste”, në Brazil. Në fund të ndeshjes, e cila përfundoi 1-1, autobusi i ekipit brazilian u qëllua me gurë në dalje të “Arena Pernambuco” nga një grup mbështetësish të organizuar të skuadrës kundërshtare.

Në videot që qarkullojnë në rrjetet sociale mund të shihni xhamat e thyer, copa xhami kudo dhe sedilje të lyera me gjak. Një episod që kujton atë që ndodhi me Fabio Grosso në Francë. 6 lojtarë të Fortaleza u lënduan dhe u dërguan në spitalin më të afërt për mjekim, siç raportohet në shënimin zyrtar të klubit të dëmtuar:

"6 lojtarë tanët u goditën. Portieri João Ricardo u plagos me një prerje në vetull. Mbrojtësi i majtë Gonzalo Escobar pësoi një goditje në kokë, prerje në gojë dhe vetull. Mbrojtësi i djathtë Dudu, mbrojtësit Titi dhe Brítez, si dhe mesfushori Lucas Sasha u plagosën nga xhamat. Sidoqoftë, ata janë më mirë dhe të vetëdijshëm. Futbollistët e tjerë do t’i nënshtrohen trajtimit mjekësor për të hequr copat e xhamit nga trupi i tyre".

Marcelo Paz, presidenti i Fortaleza, reagoi ashpër pas asaj që ndodhi: "Duhet të ketë ndëshkim të vërtetë, shembullor, mos prisni derisa dikush të vdesë. Ata hodhën një bombë. Pse dikush që hedh bomba në stadium është i ndryshëm nga dikush që bën të njëjtën gjë në rrugë? Pse këta njerëz e bëjnë këtë në të gjithë Brazilin dhe nuk arrestohen? Është koha të ndalemi, vërtet”.