Transmetuar më 22-02-2024, 12:35

Dhe të mendosh se gjithçka nisi si një shaka, gjatë një sfide në "PlayStation" me vëllain e tij më të vogël. Në të vërtetë, ishte Ethan, me të cilin tani ndan dhomën e zhveshjes te PSG, i cili e shpiku atë pas një "goli virtual".

Mbappé premtoi se do ta bënte sërish, por në fushë, në ndeshje të vërteta. Dhe kështu lindi festa e famshme e golave të numrit 7, me krahët e kryqëzuar në gjoks, e cila është kthyer në simbol të kampionit francez.

Ky lloj festimi është tashmë një markë e vërtetë tregtare, e regjistruar në Zyrën e Pronësisë Intelektuale të Bashkimit Evropian, së bashku me disa nga frazat e tij të famshme. Një lëvizje që gjen edhe më shumë vlerë me transferimin e planifikuar për në qershor nga PSG te Real Madridi.

Sipas "L’Equipe", në fakt, përfaqësuesit e sulmuesit janë duke negociuar menaxhimin e të drejtave të tij të imazhit dhe tashmë kanë bërë një hap përpara. Jo vetëm duke depozituar emrin dhe mbiemrin e kampionit, por edhe festimin e famshëm të golave.

Një çështje që daton nga viti 2017, kur u ble nga Monaco për 180 milionë euro. Zyra e BE-së e regjistroi atë zyrtarisht në vitin 2018, si një markë private, të paktën deri në vitin 2027. Sipas mediave spanjolle dhe franceze, megjithatë, Mbappé ka regjistruar edhe disa nga frazat e tij të famshme, që shoqëruan ngritjen e tij në "Olimpin" e futbollit.

Bashkohu me kanalin e NOA WhatsApp për lajmet më të fundit direkt në celularin tënd