Kur bëni analizat e gjakut, trigliceridet janë ndër vlerat që duhen mbajtur më shumë nën kontroll, pasi ato janë një tregues i rëndësishëm i shëndetit tuaj metabolik. Janë lipide të përbëra nga një molekulë glicerine dhe tri acide yndyrore, ndër më të bollshmet në ushqime dhe trupin e njeriut.

Ato janë një mënyrë e rëndësishme e grumbullimit të rezervave të energjisë, pasi kur konsumojmë vakte me më shumë kalori seç kemi nevojë në atë moment, trupi e shndërron këtë tepricë në trigliceride, për ta përdorur energjinë e rezervuar kur është e nevojshme.

Megjithatë, teprica e triglicerideve mund të jetë shumë e rrezikshme. Ato mund të rrisin rrezikun kardiovaskular (sulm në zemër, goditje në tru, trombozë, emboli) dhe lidhen me obezitetin. Nivelet optimale të triglicerideve në gjak nuk duhet të kalojnë 150 mg/dl.

Nëse shkoni më tej, fillojnë të krijojnë rreziqe për shëndetin, veçanërisht nëse faktorë të tjerë rreziku për sëmundjet kardiovaskulare janë tashmë të pranishëm. Prandaj është e nevojshme të ndryshoni disa aspekte të stilit tuaj të jetesës, veçanërisht dietën.

Nëse niveli i triglicerideve kalon 500 mg/dl, hipertrigliceridemia bëhet shumë serioze dhe është e nevojshme që të ndërhyhet në kohë jo vetëm duke ndryshuar stilin e jetës, por edhe duke ndjekur terapinë me ilaçe.

Hipertrigliceridemia mund të shkaktohet nga një dietë e varfër, një mënyrë jetese tepër sedentare, abuzimi me alkoolin, obeziteti, pirja e duhanit dhe sëmundjet e tiroides. Disa barna gjithashtu mund të rrisin nivelin e triglicerideve në gjak, të tilla si diuretikët, kortizoni, pilulat e kontrollit të lindjes dhe disa ilaçe antivirale.

Sporti, përveç dietës, mund të ndihmojë në uljen e triglicerideve. Nëse vlerat e triglicerideve i kalojnë 150 mg/dl, është e nevojshme të ndërhyni në stilin e jetës tuaj, veçanërisht duke shmangur ushqimet që përmbajnë sasi të tepërt të sheqernave të thjeshta si ëmbëlsirat, pijet me sheqer dhe lëngjet e frutave.

Gjithashtu shmangni ushqimet me shumë yndyrë. Nëse trigliceridet janë të larta, alkooli duhet të shmanget krejtësisht, pasi edhe sasitë modeste mund të shkaktojnë probleme. Në vend të kësaj, rekomandohen karbohidratet nga burimet me ndikim të ulët glicemik, të tilla si makaronat dhe buka me miell integral, ushqime të pasura me omega 3, në veçanti peshk si toni, skumbri, salmoni, sardelet.

Rekomandohen gjithashtu bishtajoret, soja, frutat dhe perimet. Aktiviteti sportiv, në veçanti aktiviteti aerobik, është gjithashtu thelbësor: nga një shëtitje e thjeshtë në një vrapim 40-minutësh, deri në not ose çiklizëm.