Transmetuar më 19-12-2023, 20:55

Ditën e sotme pritej të zhvillohej një takim mes presidentes së Kosovës Vjosa Osmani dhe kreut të Partisë Aleanca për Ardhmërinë e Kosovës, Ramush Haradinaj për të diskutuar rreth Asociacionit.

Megjithatë, takimi nuk u zhvillua dhe kjo për shkak të një incidenti që ka ndodhur në presidencë.

Mësohet se Osmani është vonuar për këtë takim, dhe Haradinaj nga ana tjetër nuk ka pritur.

Zëdhënësi i AAK-së, Kushtrim Xhemaili, ka folur për dështimin e këtij takimi.

“E kishim një vullnet të mirë për të biseduar me presidenten Osmani për çështjet me rëndësi për vendin, veçanërisht për draft-statutin e Asociacionit.

Kryetari Ramush Haradinaj si dhe sekretari i Përgjithshëm Muharrem Nitaj ishin në Presidencë në orarin e përcaktuar nga presidentja Osmani, por fatkeqësisht presidentja nuk respektoi orarin e caktuar nga vetë ajo dhe për këtë arsye takimi nuk është realizuar”, ka thënë Xhemaili.

Nga ana tjetër, zyra e presidencës ka dalë me një njoftim, ku shprehen se Haradinaj nuk ka dashur të presë.

“Takimi ishte paraparë të mbahet, por për shkaqe protokollare nuk është realizuar.

Z.Haradinaj nuk ka dashur të presë derisa protokolli e ka njoftuar presidenten për arritjen e tij”, ka thënë këshilltari për media i Presidencës, Bekim Kupina, teksa shtoi se pavarësisht kësaj, dera mbetet e hapur.

“Pavarësisht kësaj, presidentja Osmani ka lënë të hapur mundësinë e takimit ditëve në vazhdim, kurdo që kreu i AAK-së e vlerëson se duhet diskutuar dhe adresuar çështjet e rëndësisë nacionale. Dera e Presidencës vazhdon të mbetet e hapur”.

Osmani ka ftuar tre liderët e partive opozitare parlamentare për të diskutuar rreth draftit të Asociacionit të propozuar nga ndërmjetësit.

Ndërsa deri më tani ajo është takuar vetëm me kryetarin e LDK-së, Lumir Abdixhiku.

Bashkohu me kanalin e NOA WhatsApp për lajmet më të fundit direkt në celularin tënd