BRITANI- Një zjarr që ra në parkingun e makinave të aeroportit të Bristolit ka shkatërruar automjete dhe ka shkaktuar vonesa në fluturime. Zjarri shpërtheu në parkun e makinave të Zonës Silver të dielën në mëngjes.

Shërbimi i Zjarrfikësve dhe Shpëtimit Avon tha se 11 makina po digjeshin, ku katër ose pesë prej tyre ishin shkatërruar plotësisht, sipas Sky News.

Pista e aeroportit u mbyll për pak kohë si një masë paraprake sigurie, por që atëherë është rihapur. U raportuan vonesa të vogla në fluturime. Një zëdhënës i aeroportit tha për Sky News se një automjet i parkuar kishte marrë flakë në parkingun e hapur.

"Zjarri u përhap në një numër të vogël automjetesh. Nuk ka pasur të lënduar dhe zjarri është shuar shpejt nga shërbimet emergjente.", tha zëdhënësi.

Në tetor, një zjarr i madh në parkun e makinave të Aeroportit Luton dëmtoi qindra automjete dhe çoi në vonesa dhe anulime fluturimesh, duke prekur dhjetëra mijëra pasagjerë.