GJERMANI – Tashmë po konfigurohen skuadrat pjesëmarrëse në Euro 2024.

16 ekipe janë kualifikuar për në fazën finale. Kjo do të thotë se mbeten ende 8 vende vakante për të plotësuar, 5 prej të cilave do të vendosen në turin e fundit të fazës kualifikuese.

Tri vendet e mbetura do t’u jepen fituesve të “play-off”-it për të hyrë në kampionatin e ardhshëm evropian. Dymbëdhjetë vendet, që kanë rezultatet më të mira në grupe, do të ndahen në tre grupe dhe do të përballen me dy ndeshje vendimtare.

Nëse i fitojnë të dyja ndeshjet (gjysmëfinalen dhe më pas finalen) ato do të kualifikohen për në Kampionatin Evropian 2024. Shorti do të hidhet të enjten e ardhshme, më 23 nëntor, dhe ndeshjet do të luhen në fund të marsit.

Nga këto 12 vende, Polonia, Finlanda, Gjeorgjia, Greqia, Izraeli, Bosnja dhe Luksemburgu, janë shtatë vendet e garantuara tashmë për të marrë pjesë në këto “play-off”. Dhe gjithçka, falë paraqitjes së tyre pozitive në edicionin e fundit të Ligës së Kombeve.

Përveç këtyre shtatë skuadrave, janë edhe tre të tjera që, nëse nuk kualifikohen drejtpërdrejt në grupet e tyre, tashmë kanë vend në “play-off”: Kroacia, ose Uellsi, Italia, ose Ukraina dhe Kazakistani, ose Sllovenia. Një nga secili grup do të kualifikohet në Euro, pjesa tjetër do të zërë një vend në “play-off”.

Shumë vende të tjera që nuk janë më në gjendje të kualifikohen presin përfundimin e fazës kualifikuese për të zbuluar nëse kanë ende shanse për të arritur në Euro përmes këtyre “play-off”-eve. Ky është rasti i Islandës dhe Estonisë, të cilat mund të zënë vendet e mbetura të disponueshme.

Megjithatë, tashmë janë 14 skuadra që e dinë se nuk kanë asnjë shans për t’u kualifikuar, as përmes grupeve origjinale dhe as përmes play-off-it: Suedia, Letonia, Andorra, Lihtenshtajni, Malta, San Marino, Lituania, Qipro, Bjellorusia, Gjibraltari, Ishujt Faroes, Irlanda e Veriut, Maqedonia e Veriut dhe Norvegjia.