Transmetuar më 06-11-2023, 16:00

Kurbin – Zbardhet ngjarja e ndodhur pasditen e djeshme, në aksin rrugor “Laç-Milot”, ku u gjet i pajetë, në rrugë, një 53-vjeçar, ngjarje e cila u raportua fillimisht si rrëzim aksidental.

Identifikohet, kapet dhe vihet në pranga 28-vjeçari, i cili nga hetimet rezultoi se ka përplasur 53-vjeçarin, me automjet, dhe më pas është larguar nga vendi i aksidentit.

Po ashtu është sekuestruar automjeti, raporton noa.al.

Policia tha zyrtarisht u kryen veprime hetimore për zbardhjen e ngjarjes së ndodhur rreth orës 18:00, të datës 05.11.2023

Bëhet fjalë për ngjarjen në aksin rrugor “Laç-Milot”, ku fillimisht u dyshua se aksidentalisht humbi jetën, si pasojë e rrëzimit në rrugë, duke qenë në gjendje të dehur, shtetasi Luan Kolici 53 vjeç, banues në Kurbin.

Por nga një hetim i thelluar u identifikua dhe u vu në pranga shtetasi E. S., 28 vjeç, banues në Kurbin.

Nga këto veprime rezultoi se shtetasi E. S. ka përplasur me automjet, shtetasin L. K. dhe është larguar nga vendi i aksidentit.

Si pasojë, 53-vjeçari humbi jetën në vendngjarje.

Në vijim, në cilësinë e provës materiale u sekuestrua automjeti tip “Benz”, i shtetasit E. S., mjet që e shihni në foto.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.

https://noa.al/lajmi/2023/11/2410211.html

Bashkohu me kanalin e NOA WhatsApp për lajmet më të fundit direkt në celularin tënd