Drejtori sportiv i Interit, Piero Ausilio, ka reflektuar mbi krisjen e fortë me Romelu Lukakun në verë dhe pse klubi zgjodhi Yann Sommer për portën, pas shitjes së Andre Onana.

Zikaltrit fillimisht kishin planifikuar të rikthenin sulmuesin belg në verë, pasi ai shkoi te Chelsea në mbyllje të huazimit në “San Siro”, por pas raundeve të ndryshme bisedimesh hoqi dorë. Kjo gjë shkaktoi zemërim të madh te zikaltrit, sidomos pasi u zbuluan bisedimet e tij sekrete me Juventusin.

Lukaku u prit me protesta nga tifozët e Interit, kur u kthye me Romën në fundjavë, duke u sharë dhe fyer me zë të lartë. Pra, është e qartë se “ura” është djegur përgjithmonë mes lojtarit dhe klubit zikaltër.

Duke folur në një intervistë për “Radio Serie A”, Ausilio fillimisht u hap për Lukakun, atë që ndodhi në verë dhe ku janë gjërat tani: “Preferoj të mos flas për një lojtar që është në një klub tjetër, nuk e kam bërë kurrë këtë muajt e fundit.

Thjesht po them se më pëlqen të mendoj për të tashmen dhe të ardhmen, ndërkohë që Lukaku është pjesë e së shkuarës. Me të fituam një titull, shitja e belgut te Chelsea na solli një fitim të konsiderueshëm kapital. Bashkë me të humbëm edhe dy finale.

Thjesht po them që duhet të ketë edukatë dhe respekt, gjërat po ecnin përpara, kjo ishte evidente, por në një moment ndaluan. Ka operacione që nuk kalojnë, por nëse ka respekt, nuk është kurrë problem.

Megjithatë, kur fshiheni ose dërgoni përgjigje përmes njerëzve të tjerë, vërtet mendoni të vazhdoni përpara?! Për mua është një kapitull i mbyllur që nga 8 korriku, nuk kam asnjë keqardhje”.

Ausilio u pyet për telefonatën tashmë famëkeqe mes tij dhe sulmuesit belg në verë: “Ishte një thirrje e fortë, por asgjë e veçantë. I thashë Romelu atë që mendoja, pasi nuk mund ta dëgjoja për disa kohë”.

Drejtori sportiv i Interit më pas preku anekdota të ndryshme të tregut të transferimeve, duke filluar nga Lautaro Martinez: “Historia e Lautaro është e veçantë. Ai në fakt ishte afër Atletico Madridit, kishte 4 ditë negociatash të çmendura”.

Drejtori sportiv zikaltër foli për marrëveshjen më të komplikuar: “Ka shumë…, nuk ishte e lehtë të merrnim Pavard nga Bayern Munich, sepse klubi bavarez nuk ishte i gatshëm ta largonte atë”.

Ausilio zbuloi një keqardhje nga tregu i transferimeve: “Fabregas, kur ishte 16 vjeç. Ne bëmë gjithçka që mundëm për ta marrë atë, por nuk kishim asnjë shans, sepse shkoi tek Arsenali nga Barcelona”.

Së fundi, Ausilio shpjegoi pse Interi zgjodhi të zëvendësojë Onana me Sommer gjatë verës: “Ne kishim nevojë për siguri, ishte larguar edhe Handanovic. Gjej rastin të them se Samir do të qëndrojë të punojë me ne, ka një projekt që do ta përfshijë.

Mund të ishim fokusuar te portierët më të rinj, por Sommer ishte ai që na duhej vërtet dhe po e dëshmon. Kur mbërriti, ai kishte mësuar tashmë fjalët e rëndësishme në italisht për një portier. Është një profesionist i çmendur”.