“Një kapiten, ka vetëm një kapiten”, – kënduan tifozët e Juventusit në “Pala Alpitour”. Ai kapiten mund të jetë vetëm Alessandro Del Piero, një nga lojtarët më të vlerësuar ndonjëherë në mesin e atyre që dolën në fushë në ndeshjen e futbollit 7×7, midis legjendave të Juventusit, gjatë festimeve të mbrëmshme "Together, a Black & White Show".

Në fund të takimit simbolik, ish-numri 10 i Juventusit komentoi: "U argëtuam, ndonjëherë edhe vraponim. Ishte shumë bukur të festoja me familjen ‘Agnelli’. Emocion kur kënduan në kor emrin tim? Shumë. Për fat, me tifozët kemi përjetuar shumë të mira, por edhe të këqija. Gjithmonë e kemi përjetuar çdo gjë me shumë pasion dhe emocion, publiku ka qenë gjithmonë i pranishëm”.

“Pinturicchio”, para se të merrte pjesë në ndeshjen ku do të shënonte edhe një gol, kishte deklaruar: "Është e vështirë të shpjegosh se çfarë ndjeva kur hyra në fushë, emocioni është gjithmonë unik. Ne ndamë 19 vite me gjithçka brenda, në mënyrën më të pastër dhe pasionante të mundshme. Për këtë do të jem gjithmonë mirënjohës. Nuk ka futboll pa tifozët, ndamë emocione të mrekullueshme me ta”.

Më pas, gjatë ngjarjes në “Sky Sport”, i cili transmetoi gjithçka kushtuar 100 viteve të presidencës ‘Agnelli’, Del Piero pati një bisedë të këndshme me ish-bashkëlojtarin e tij Giancarlo Marocchi, me të cilin kujtoi startin e tij bardhezi.

"Kur mbërrita në fillim në dhomën e zhveshjes së Juventusit, isha gjithmonë i vëmendshëm ndaj asaj që ndodhte. Kishte nga ata që talleshin, të tjerë ishin seriozë. Mësova shumë, – tha ish-sulmuesi i kombëtares italiane, kampion bote më 2006.

– Unë jam bërë kapiten, por aty kishte shumë liderë dhe ky është fati më i madh që mund të ketë një klub. Më emocionuese ovacionet në ‘Bernabeu’ apo sonte? Janë dy gjëra të ndryshme dhe po aq të bukura. Këta janë gjithmonë tifozët e mi, është bukur të dalësh me komplimente nga një stadium i tillë”.

Ndërkohë, tifozët e fundit që mbetën në ‘Pala Alpitour’ brohorisnin përsëri: "Ale, ka vetëm një kapiten…”