Rrjeti radioteleviziv amerikan Zëri i Amerikës, i cili financohet nga Departamenti i Shtetit, pohoi sot se palestinezët duan një shtet të tyrin në të tre territoret të pushtuara nga Izraeli në luftën e vitit 1967.

Media kryesore publike amerikane nënvizon se bisedimet e fundit serioze të paqes u ndërprenë më shumë se një dekadë më parë.

Po ashtu VOA evidenton faktin tjetër se qeveria e ekstremit të djathtë të Izraelit është kundër shtetit palestinez.

Territoret palestineze janë rajonet e ish-Mandatit Britanik për Palestinën që janë pushtuar ushtarakisht nga Izraeli që nga Lufta Gjashtë Ditore e vitit 1967, përkatësisht: Bregu Perëndimor (përfshirë Jeruzalemin Lindor) dhe Rripin e Gazës.

Gjykata Ndërkombëtare e Drejtësisë (GJND) i ka referuar Bregut Perëndimor, përfshirë Jeruzalemin Lindor, si Territori i Pushtuar Palestinez, dhe ky term është përdorur si përkufizim ligjor nga GJND në opinionin e saj këshillues të korrikut 2004.

Termi territor i pushtuar palestinez u përdor nga Kombet e Bashkuara dhe organizata të tjera ndërkombëtare midis tetorit 1999 dhe dhjetorit 2012 për t’iu referuar zonave të kontrolluara nga Autoriteti Kombëtar Palestinez.

Që nga viti 2012, kur Palestina u pranua si një nga shtetet e saj vëzhguese joanëtare, Kombet e Bashkuara filluan të përdorin ekskluzivisht emrin Shteti i Palestinës.

Bashkimi Evropian (BE) miratoi gjithashtu termin territor i pushtuar palestinez me një term paralel territore të Autoritetit Palestinez që përdoret gjithashtu herë pas here.

Qeveria e Izraelit dhe mbështetësit e saj kanë përdorur nocionin "territore të diskutueshme" në vend të faktit se ka pushtuar territoret palestineze.

Palestina ka një popullsi prej 5,051,953 që nga shkurti 2020, renditur e 121-të në botë.

Sakaq Hamas njoftoi sot se e nisi sulmin në përgjigje të vuajtjeve në rritje të palestinezëve nën pushtimin izraelit në Bregun Perëndimor, bllokadës së Gazës, politikave diskriminuese në Jerusalemin lindor të aneksuar dhe tensioneve rreth një vendi të shenjtë për myslimanët dhe hebrenjtë në Jerusalem.