"Unë mendoj se kjo historia e Arabisë Saudite do të jetë relativisht jetëshkurtër. Tashmë e kam thënë disa herë, për mendimin tim është një qasje e gabuar për zhvillimin e futbollit. Blerja e lojtarëve që praktikisht e kanë përfunduar karrierën në Evropë nuk e zhvillon futbollin.

Kina bëri të njëjtën gjë vite më parë, por kombëtarja e saj nuk arriti të kualifikohej në Kupën e Botës”. Kështu, presidenti i UEFA-s, Aleksander Ceferin, duke folur për "sulmin arab" ndaj lojtarëve dhe trajnerëve evropianë, në një intervistë për faqen sllovene N1, pranon se, në krahasim me projektin kinez, në rastin e Arabisë Saudite "mund të flasim për një nivel tjetër, të paktën për sa iu përket emrave.

Sidoqoftë, nuk është një nivel shumë i ndryshëm për sa iu përket parave. Carlos Tevez, i cili ishte një futbollist i madh, kishte kontratë 100 milionëshe në Kinë, në atë kohë. Sot shifrat janë ndoshta pak më të larta, por nuk shoh yje të rinj si Erling Haaland dhe Kylian Mbappe të interesuar për të shkuar në Arabinë Saudite".

Ceferin përjashton të ketë marrë oferta “të pahijshme” nga Arabia Saudite: "Asnjë ofertë apo ftesë. Thuhet se Arabia Saudite do të donte shumë të priste finalen e Champions League, apo se klubet e saj do të luanin edhe në Champions League, por kjo më vjen gjithmonë përmes ndërmjetësve.

Ndonjëherë lexoj në media shumë ‘të besueshme’ se tashmë po flasim për marrëzi totale. Liga e Kampionëve do të luhet në Evropë dhe në të do të marrin pjesë vetëm ekipe nga vendet anëtare të UEFA-s. Nuk kemi thënë asnjë fjalë për opsionet e tjera”.

Përfshirë një finale të mundshme të Ligës së Kampionëve në Riad: “Për momentin nuk shoh as mundësinë më të vogël”.