Milani është gati ta tregojë veten edhe një herë. Këtë të shtunë nuk luhet për finalen e Ligës së Kampionëve, si herën e fundit mes dy skuadrave milaneze, por për kreun e vetmuar të Serie A, përveç epërsisë së qytetit që është sfondi i një sfide gjithmonë magjepsëse dhe plot ide.

Interi dhe Milani arrijnë në përplasjen e madhe direkte në kushtet më të mira të mundshme, të barazuar në renditje me nga 9 pikë pas tri ndeshjeve të para. Një rrugë e qartë për të dyja skuadrat, me zikaltrit që madje e mbajnë portën e Sommer të pastër deri më tani.

Ajo që është bërë deri në këtë pikë, megjithatë, sot në orën 18:00 do të llogaritet pak ose aspak. Është momenti për përballje të drejtpërdrejtë, e cila del pranë rikthimit të emocioneve të fazës së grupeve të Champions League, menjëherë pas pushimit prej kombëtareve, që si çdo herë tjetër sjell me vete disa të panjohura më të vogla në krahasim me të kaluarën e afërt.

Pavarësisht se si do të përfundojë, data 16 shtator 2023 do të mbetet në historinë e “Derby della Madonnina” për shkak të rëndësisë së brendshme të një ndeshjeje që ndodhi vetëm një herë me Interin dhe Milanin në vendin e parë në renditje.

I vetmi precedent në këtë kuptim ka të bëjë me sezonin 1961-1962, kur zikaltrit mbizotëruan falë golave ​​të Egidio Morbello dhe Luisito Suarez, për t’u dorëzuar më pas në fund ndaj Milanit që u bë kampion i Italisë me 5 pikë epërsi.

Me atë rast, megjithatë, në krye të renditjes ishte një treshe dhe jo një çift: skuadra tjetër ishte Fiorentina, forca e tretë përfundimtare e atij kompeticioni.

Inter-Milani i sotëm është si rrjedhim një derbi unik në historinë e Serie A, i pari absolut për sa i përket kontekstit aktual që i sheh dy skuadrat milaneze në komandë, me dy pikë avantazh ndaj ndjekësve të tyre më të afërt.

Ky do të jetë derbi i pestë i vitit 2023, me ngjyra absolutisht zikaltër. Në katër të mëparshmit, Interi ka fituar gjithmonë, me një produkt të pamëshirshëm prej 7 golash të shënuar dhe asnjë të pësuar.

I pari, i datës 18 janar, iu dha lojtarëve të Simone Inzaghit Superkupën e Italisë në Riad, kryeqytetin e Arabisë Saudite. Një dominim i qartë, i vërtetuar nga pjesa e parë që u mbyll me avantazhin e dyfishtë, falë golave të Dimarco dhe Dzeko. Në pjesën e dytë ishte Lautaro, ai që e vulosi njëherë e mirë rezultatin, duke nisur një periudhë krize për skuadrën e Piolit.

Një pengesë që minoi siguritë e kuqezinjve, të poshtëruar nga Lazio (4-0) dhe Sassuolo (5-2) përpara derbit të ri të vlefshëm për javën e 21-të të Serisë A. Një tjetër raund me shumë gëzim për Interin, që fitoi falë goditjes me kokë të Lautaro. Diferenca në ndeshje, pa diskutim, megjithëse rezultati i pakët e bën njeriun të mendojë për diçka tjetër.

Ky ishte Milani i ridizenjuar nga Pioli me 3-4-3, një lëvizje e dëshpëruar, që i lejoi kuqezinjtë të dilnin nga tuneli përpara se të ktheheshin në modulin klasik 4-2-3-1 dhe të kualifikoheshin në Champions League.

Për ta përfunduar “punën” për Interin, ja ku janë edhe dy derbet e luajtura më 10 dhe 16 maj, të vlefshme, ashtu si në vitin 2003, për kalimin në finalen e Champions League.

Ndryshe nga atëherë, ishin zikaltrit që triumfuan dhe shkuan në finalen e Stambollit. Milani mbeti pa të dëmtuarin Leao në ndeshjen e parë dhe u ndëshkua në minutat e para nga Dzeko dhe Mkhitaryan.

Shumë më tepër ekuilibër në derbin e kthimit gjysmëfinal. Fitoi sërish (1-0) Interi, me golin e shënuar nga Lautaro. Ky ishte goli i tij i tetë në 14 derbe të luajtura në të gjitha garat.

Duke marrë parasysh vitin 2023, objektivi kryesor te Milani do të jetë ndalimi i “gjakderdhjes” së humbjeve në derbi, për t’u kthyer sërish te gëzimi një vit pas herës së fundit.

Më 3 shtator 2022, Milani dhe Interi u përballën me njëri-tjetrin (përsëri në orën 18:00, të së shtunës), në javën e pestë të Serie A. Mysafirët kaluan në epërsi me Brozovic, duke u përmbysur me golat e Leao dhe Giroud. Performanca e mprehtë e Dzekos u bë e padobishme më pas nga pritjet e mëdha të Maignan, protagonistit absolut me reflekset e tij mes shtyllave dhe, veçanërisht, në një goditje të Calhanoglu të drejtuar në trekëndësh.

Ky triumf duket se ishte në gjendje ta niste Milanin drejt majave të reja, pas titullit të 19-të, një plan i ‘prishur’ nga Napoli i Luciano Spallettit falë paraqitjeve mahnitëse, që i lejoi napolitanët të festonin “trengjyrëshin” e tretë në historinë e tyre.

Janë 237 precedentë në total, në kompeticionet e ndryshme, mes Interit dhe Milanit. Bilanci është në favor të ‘Biscioneve’ me 89 fitore, kundrejt 79 fitoreve të kuqezinjve dhe 69 barazimeve.