Ngjarje e pazakontë në një fshat të Fierit. Policia e arreston për armë pa leje, babë e bijë shkojnë dhe i vjedhin 23 mijë euro.

Një 48-vjeçar ka rënë në prangat e policisë nën akuzë për vjedhjen e 23 mijë eurove në shtëpinë e një personi në Fier.

Ngjarja ka ndodhur në Levan, ku 48-vjeçari Fatmir Latifi dhe personi të cilit i kishte vjedhur paratë jetonin të dy.

Po ashtu, policia ka vënë nën hetim edhe vajzën e 48-vjeçarit, Marsela Latifi 22 vjeç, pasi akuzohet se ka ndihmuar të atin.

Policia lokale njofton se ‘si rezultat i hetimeve intensive, të kryera nga shërbimet e Komisariatit të Policisë Fier, pas indicieve se një shtetasi të arrestuar ditën e djeshme, për armëmbajtje pa leje, i kishin vjedhur në banesën e tij (në oborrin e së cilës, u gjetën të fshehura në një çantë, 3 pistoleta, 1 armë gjahu dhe fishekë luftarak), një shumë parash, u organizua dhe u finalizua faza e dytë e operacionit policor të koduar “Sinjali”.

Gjatë kësaj faze, u kap dhe u vu në pranga shtetasi F. L., 48 vjeç, banues në fshatin Levan, Fier. Nga veprimet hetimore dyshohet se 48-vjeçari ka vjedhur në banesën e shtetasit tashmë të arrestuar V. M., 23 000 euro.

Në vijim të veprimeve procedurale për këtë rast, u referuan materialet në Prokurori ku nisi procedimi në gjendje të lirë, për vajzën e shtetasit F. L., shtetasen M. L., 22 vjeçe, banuese në fshatin Baltëz, Fier, pasi dyshohet se ka bashkëpunuar me 48-vjeçarin, për të kryer këtë vjedhje.

Gjatë kontrolleve në banesën e shtetasit F. L., Policia gjeti dhe sekuestroi në cilësinë e provës materiale, 8100 euro të dyshuara nga shuma e vjedhur në banesën e shtetasit V. M.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.