Zakonet e këqija që duhen shmangur

Të gjithë shoferët kanë zakone të mira dhe të këqija. Varësisht nga sa… vite, por edhe sa eksperiencë kemi në timon, ndryshon edhe mënyra e vozitjes.

Megjithatë, disa zakone mund të jenë të rrënjosura thellë tek ne dhe shumë prej tyre mund të krijojnë probleme në makinën tonë.

Zakonet e këqija të mirëmbajtjes së makinave janë një realitet me të cilin përballemi të gjithë.

Pavarësisht nëse i njohim apo jo, këto zakone mund të kenë pasoja të rënda në gjendjen funksionale të makinës sonë.

Në fakt, sipas Car and Motor që citon noa.al janë 10 zakone specifike, të cilat krijojnë probleme në makinën tonë.

Le të shohim në detaje

1.Xhiro të larta me motor të ftohtë

Nuk është aspak e këshillueshme të ndizni një motor të ftohtë dhe të ngreni menjëherë shpejtësinë për të rritur më shpejt temperaturën e tij. Nëse e bëni këtë, dijeni se do të shkaktoni konsumim të parakohshëm, sepse vaji nuk ka arritur ende temperaturën e funksionimit dhe motori nuk është lubrifikuar siç duhet.

2.Shtyrja e bërjes së shërbimeve

Të gjithë prodhuesit e makinave rekomandojnë që ne të ndjekim një kalendar specifik të mirëmbajtjes dhe ta mbajmë makinën në gjendje të mirë pune. Në afat të shkurtër, mund të mos duket sikur po bëjmë ndonjë dëm duke anashkaluar ndërrimin e vajit, filtrit të ajrit ose gomave.

Por e vërteta është se ndjekja e mirëmbajtjes së planifikuar do të na ndihmojë të shmangim riparimet e mëdha në të ardhmen.

3.Indiferenca ndaj llambave treguese

Makinat moderne kanë një numër treguesish paralajmërues në panelin e instrumenteve dhe këto na informojnë për probleme specifike. Nëse i shpërfillim ato mund të na lënë në rrugë me një makinë të prishur. Në varësi të problemit, ai mund të rrezikojë edhe sigurinë tonë.

4.Indiferenca ndaj presionit të gomave

"Puna e mirëmbajtjes" më e lehtë që shumica prej nesh shmangin është kontrollimi i presionit të gomave. Nëse goma nuk është në presionin e rekomanduar të ajrit, të sugjeruar nga prodhuesi, kjo mund të çojë në një sërë problemesh, pavarësisht nëse ka të bëjë me konsumin dhe performancën e gomave, ose konsumin e karburantit. Për këtë arsye është mirë që gomat të kontrollohen një ose dy herë në muaj.

5.Mënyra e frenimit

Sistemi i frenimit (frenave) është një nga sistemet më të rëndësishme të sigurisë që kemi, por shtypja shumë e fortë e pedalit të frenave ose përdorimi i tij shumë shpesh mund ta rrezikojë sistemin. Për shembull, aplikimi i frenimit për një periudhë të gjatë kohore mund të shkaktojë mbinxehje të sistemit të frenimit dhe uljen e fuqisë së tij.

6.Xhami i përparmë i thyer

Shumë herë ne jemi duke vozitur dhe dëgjojmë një zhurmë të vogël të një guraleci që bie në xhamin e përparmë të makinës sonë dhe më pas zbulojmë se ai ka lënë një shenjë mezi të dukshme në të. Disa njerëz mendojnë se nuk kemi nevojë të bëjmë asgjë për këtë, por e vërteta është se mundësia që dëmi të përkeqësohet është shumë e lartë.

7.Ndërrimi i marsheve pa u ndalur

Edhe nëse jeni me shpejtësi të ulët, ndërrimi i marsheve pa ndalur plotësisht i jep stres shtesë kutisë së marsheve dhe ka të ngjarë që disa sekonda që kurseni gjatë procesit nuk ia vlen kostoja e konsumimit të parakohshëm të shasisë.

8.Larje e rrallë e makinave

Të gjithëve u pëlqen të kenë një makinë të sapo larë, por përfitimet e larjes shkojnë përtej efektit vizual. Nëse kalojmë periudha të gjata kohore pa larë makinën tonë, papastërtia ndikon në llakun e bojës, duke shkatërruar në thelb ngjyrën.

9.Rritja e shpejtësisë në gunga (policët e shtrirë)

Në disa rrugë instalohen gunga të kufizimit të shpejtësisë për të ngadalësuar shoferët në vendkalime dhe për t’i bërë zonat urbane më të sigurta për këmbësorët. Nëse kaloni mbi një të tillë, me shpejtësi të ulët, makina nuk do të ndikohet. Përndryshe, ju mund të dëmtoni makinën.

10.Palëvizshmëri për një kohë të gjatë

Parkimi i makinës dhe mbajtja fikur për një kohë të gjatë dhe mos ndezja e motorit mund të dëmtojë baterinë. Nga ana tjetër, gomat do të plasariten nga plakja dhe disa pjesë të trupit të mjetit mund të arrijnë kufijtë e tyre. /noa.al