Pas ditës së Lukakut, që fjalë për fjalë e mrekulloi popullin verdhekuq, tifozët e Romës mezi presin të përqafojnë sulmuesin e tyre të ri në “Olimpico”. Dhe mundësia mund të shfaqet që në mbrëmjen e së premtes.

Natyrisht, “Big Rom” mund të mos jetë gati për të luajtur pas një vere të komplikuar të kaluar në stërvitje i vetëm, në periferi të projektit të Chelsea, por në pritje të njoftimit zyrtar këtë të mërkurë, ai do të ketë seancën e parë stërvitore në Trigoria, nën urdhrat e José Mourinhos.

Belgu do të punojë me bashkëlojtarët e rinj për dy ditë, më pas të premten në mbrëmje do të zhvillohet menjëherë ndeshja kundër Milanit, në të cilën me shumë gjasa do të thirret dhe do ta nisë nga pankina.

Pritet një stadium i mbushur plot dhe kundër kuqezinjve, ish-sulmuesi i Interit (edhe në Romë do të mbajë numrin 90, në kontratën e të cilit, përveç bonuseve që lidhen me paraqitjet dhe golat, ka edhe një shpërblim të majmë për fitimin e titullit) mund të luajë minutat e para me fanellën verdhekuqe.

Më pas për Lukakun, i cili luajti ndeshjen e tij të fundit zyrtare më 20 qershor me Belgjikën (Estonisë), do të jetë koha për punë, sepse testet mjekësore të kryera dje në “Villa Stuart” konfirmuan se fiziku është solid, por disa kilogramë duhet të hiqen për të arritur peshën ideale, e cila është 101 kg.

Mourinho dhe stafi i tij do të përgatisin një program specifik në fushë dhe në palestër me synimin për ta prezantuar xhevahirin e ri si titullar në ndeshjen kundër Empolit në “Olimpico”, më 17 shtator.

Roma ëndërronte ardhjen e Lukakut dhe ndoshta nuk dëshiron të zgjohet. Pas lamtumirës së Ibanez, verdhekuqtë kishin bërë të ditur se do të tentonin të nënshkruanin me një tjetër qendërmbrojtës dhe dje, ndoshta pikërisht prej efektit Lukaku, në kryeqytet filloi të qarkullonte emri i Sergio Ramos, i cili do të mbërrinte me parametra zero, pas përvojën te PSG.

Klubi verdhekuq ka mohuar çdo interes, por presidenti Friedkin i ka mësuar njerëzit e tij me surpriza të pabesueshme dhe mbyllja e merkatos është ende tri ditë larg.