Kukës-  Policia e Kukësit ka përfunduar operacionin e koduar "Regjistri", i cili synonte goditjen e një rrjeti kriminal të falsifikimit të dokumenteve për qëllime të përfitimit. Pas një hetimi disamujor me metoda speciale, autoritetet kanë arrestuar shtetasin 57-vjeçar i cili dyshohet se ka kryer këto vepra penale.

Sipas informacioneve të zbuluara, ky i dyshuar ka falsifikuar dokumente për të regjistruar një fëmijë të mitur imagjinar si vajzën e tij, duke përdorur këtë identitet për të përfituar pension më të lartë në bazë të ligjit të kohës. Në vitin 2021, ai gjithashtu kishte falsifikuar dokumente për të shpallur fëmijën e mitur të vdekur, me qëllim që ta çregjistrojë nga regjistri civil.

Policia informon se ‘specialistët e seksionit për Hetimin e Krimit Ekonomiko-Financiar të DVP Kukës kanë siguruar informacione për një rast të falsifikimit të dokumenteve, me qëllim përfitimin, dhe mbi këtë bazë kanë iniciuar një procedim penal në Prokurorinë pranë Gjykatës së Shkallës së Parë të Juridiksionit të Përgjithshëm Kukës, për dokumentimin e plotë të këtij rasti, si dhe për arrestimin e shtetasve përgjegjës.

Si rezultat i hetimeve disamujore, me metoda proaktive, të kryera në bashkëpunim me Prokurorinë e Kukësit, u organizua dhe u finalizua operacioni policor i koduar “Regjistri", si rezultat i të cilit:

U arrestua  Xh. S., 57 vjeç, banues në Kukës, për veprat penale "Mashtrimi" dhe "Falsifikimi i vulave i stampave dhe i formularëve";

U referuan materialet në Prokurori ku nisi procedimi në gjendje të lirë, për veprën penale “Shpërdorimi i detyrës”, për shtetasit A. E., me profesion mjek, dhe A. E., administrator i një agjencie funerale.

Nga provat e siguruara dyshohet se për të përfituar pension më të lartë bazuar në ligjin e kohës, shtetasi Xh. S. ka falsifikuar dokumente, 21 vjet më parë, dhe ka regjistruar brenda trungut të tij familjar (si të bijën), identitetin e një shtetaseje të mitur e cila nuk ekzistonte. Gjithashtu, në vitin 2021, 57-vjeçari ka falsifikuar skedën për vdekjen e kësaj shtetaseje, me qëllim çregjistrimin nga regjistri i Gjendjes Civile.

Për shtetasit A. E. dhe A. E. vijojnë hetimet, me qëllim provimin nësë këta shtetas kanë qenë apo jo të implikuar në nxjerrjen e dokumenteve false që ka përdorur shtetasi Xh. S.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme’.